الجمعة، مايو 29، 2009

يوم لمدينه المنصوره < توبه >


يوم الى مدينه المنصوره 
ويارتنى ما روحت بس الحمد لله 
امبارح كنت فى رحله مكوكيه للمنصوره اشترى حاجات 
المهم ايه بقى  بغض النظر عن القطر الدرجه التانيه مميزه الى هى تقريبا درجه تالته تحت العاديه وعن مواعيده الى مش مميزه خالص يعنى القطر مشى بعد معاده يجى بنص ساعه ولا عن قطر الرجوع الى برده زيه زى قطر الصبح ولا عن المحطات الى مش فيها لوحات ارشاديه تعرفك فين رايح ومنين جاى لفين وكانك فى متاهه ابدا ابدا انا مش هتكلم عن كل ده دلوقتى 
ممكن فى اخر البوست
المهم بقى انا استفدت من اليوم ده كام حاجه كده 
اولا 
انت لما تبقى ناوى تعمل شئ لله وترجع فيه جهز نفسك لعدم التوفيق 
ازاى فرضا يعنى فرضا مثلا صاحب موقع اغانى ونوى انه يقفله ويقلبه قرأن وبعد فتره قال لا انا هرجعه اغانى تانى او اغانى محترمه 
يجهز نفسه انه مش هيصادفه التوفيق ولا حتى التيسر فى الامور 
وقيس على كده حاجات كتيره جداااا 
ثانيا 
البلد دى احسن من غيرها 
اه بجد والله, يعنى ما تسافرش بلد تانيه تقول اصل الحاجه فيها ارخص او احلى او مميزه , ليه بقى اقلك انا بلدك انت عارف كل حته فيها 
عارف فين المناطق الحلوه والوحشه عارف مين اسعاره احلى عارف هتروح فين بالظبط وفين افضل مكان علشان تشترى منه انما البلد الغريبه انت بتنزل تهيم على وجهك فيها مش عارف نظام البلد مش عارف فيها فين افضل المحلات او مين الى ممكن يضحك عليك ومين الى هيبقى هوين عليك فى السعر, كمان لازم تحط فى اعتبارك المصاريف الى هتتصرف فى السفريه مواصلات واكل وشرب  اذا ماكنتش المصاريف الى هتتصرف فى السفريه + الحاجات الى هتشتريها ارخص من بلدك يبقى ما تسافرش لانك هتكون معملتش حاجه 
انت بس ممكن تسافر فى حالتين 
لو هيبقى معاك واحد من اهل البلد يعرفك الاماكن ويوديك الاماكن الى تعرف تشترى منها 
ولو المصاريف الى هتصرفها فى السفر هتكون اقل وارخص من لو اشتريت من بلدك 
غير كده شايفه انها عمليه غير مجديه 
ثالثا 
فى مره كنت اتكلمت مع صديق عزيز واتكلمنا عن سفر المرأه وكده المهم بينى وبينكم هو اقنعنى انه حرام ان الست تسافر بدون محرم
بس بينى وبينكم برده قلت ايه يلا معلش بقى او يعنى عادى قوم ايه بقى انا كنت قلتله خلاص يعنى هحاول انى ماسفرش تانى لوحدى 
ويشاء الله ان اكتر من سفريه بعدها تكون مثلا هسافرها لوحدى ما تحصلش , وبعدين جت سفريه المنصوره دى !!!
فى الاول السفريه كانت عاديه من حيث اننا لحقنا معاد القطر وكده وانى استمتعت فى بدايه اليوم الا ان نهايه اليوم ماكنتش عاطفيه خالص 
اولا ما عملتش اى حاجه من الى كنت مسافره ليها 
ثانيا فى الرجوع بقى حدث ولا حرج  لما وصلت المحطه الى المفروض انزل فيها مالقتش رصيف فا مشيت لاول القطر علشان الاقى رصيف  قوم ايه بقى عقبال ما اتمشيت شويه كان القطر مشى تانى !!
واضطريت انى انزل فى المحطه التانيه وانزل اركب مواصله تاااانى علشان ارجع بلدى 
ساعتها بس قلت توووووبه ان كنت اسافر تانى لوحدى او بدون محرم 
************
على الرغم من ان السفريه فى مجملها مش كانت كويسه او مش موفقه بس 
يكفينى انى استخلصت الكام حاجه الى فوق واتعلمتهم علشان ما اكررهمش تانى 
وكمان دخلت صليت فى جامع ودى كانت اول مره اعملها انى اكون خارجه وادخل اصلى الفرض والصراحه هى كانت امنيه والحمد لله اتحققت 
كمان استمتعت جداااا بمنظر الاراضى الزراعيه وانا ماشيه بالقطر وجه فى بالى 
ان مصر جنه الله فى الارض بس  لولا الناس الى مبوظنيها والى ربنا يهديهم او يستبدلهم بالافضل الى يصلحوا حال مصر 
حاجه كمان اخيره  الناس الكويسه لسه كتييير والحمد لله وان كانوا مش ظاهرين وده لسوء النوعيات الوحشه والى هى ظاهره  قوووى
ليه بقول كده لما فاتنى النزول فى المحطه قعدت جمب اتنين رجاله كبار صعايده وحقيقى شهامه ورجوله الصعايده عرضوا عليا فلوس علشان اركب اروح لبلدى وكمان كانوا متابعين اى محطه اقرب انزل فيها وكل ما القطر يهدى شويه يشفوا اذا كانت محطه هيقف فيها ولا لا علشان انزل بجد ربنا يكرمهم 
ووووبس كده ولغايه هنا اعتقد خلاص معنتش هعمل رحلات مكوكيه لاى مكان تانى لوحدى او بدون محرم
ودعواتكم بقى لمصر ولشباب مصر النهارده الجمعه ويوم مفترج 
********** 
شكر خاص لصحبتى و انتيمتى الى انا مدوخاها معايا فى كل حته 
ربنا يكرمها يارب ويوفقها فى حياتها ان شاء الله 

الخميس، مايو 21، 2009

يوم فى مدينه السويس


كوبايه شاى مع سيجارتين ........
لالالا فطار وكوبايه شاى بلبن  مع مدونتين وبالمره اشوف الرسايل <<< مهمه بقى تعملوا ايه 
المهم  من كام يوم روحت السويس 
وصراحه مدينه جميله ونظيفه يعنى حسيت ان تخطيطها حلو والتشجير فيها برده لذيذ بس الغريب الى فيها هو الغربان فيها كميه غربان كتيييييييييييره جداا 
المهم انا فى اليوم ده جت على بالى كام خاطره كده وهما ايه بقى 
واحنا ماشيين فى الطريق كان فى جبال وصحرا ومناطق واااااااسعه ومقطروات كبيييييييييره بتعدى 
جه فى بالى بقى الايه القرأنيه الى بتقول 
>> لمن الملك اليوم لله الواحد القهار <<
حقيقى الايه دى على قد ما هى بسيطه ومنطقيه الا ان فيها كميه رهبه كبيره جداااااااااا وتحس فيها بعظمه ربنا وقوته وجلاله 
اصل ايه بقى انا جه فى بالى واحنا ماشين بالبيجو فرضا انا بقيت املك الارض دى كلها بكل الى فيها وديان واراضى حسيت انها هتبقى مسؤليه كبيره وجه فى بالى فرعون وهو بيدعى انه الاله, وجه فى بالى أن فرضا لو انا بقيت لوحدى على الارض ماكنش هيبقى ليها معنى وساعتها حسيت بالايه دى ولمن الملك اليوم ؟؟؟ حسيت روحى بتقول لله الواحد القهار اصل ماينفعش انها تكون لحد تانى غير ربنا تدبير الكون بنظام  وتدبير احوال البشر وتدبير كل حااااااااااااااااجه استحاله يقدر عليها غير الواحد القهار > سبحانك يارب بنشوف عظمتك فى كل حال من احوالنا بس احنا الى نسينا التدبير واتعودنا على الاليه وان كل حاجه حواليا ده العادى مع ان احنا لو تفكرنا شويه هنلاقى ان مافيش حاجه اسمها عادى فى حياتنا كل حاجه بتحصل حتى لو كان جرح فى ايدك فاده ممكن يكون لحكمه تخريج دم فاسد او او او وان لولا الجرح لكنت ممكن تمرض  بأختصار خلونا نصفى روحنا شويه ونستمتع احيانا بالتأمل فى خلق الله علشان روحنا تصفى ونعرف قد ايه عظمة ربنا .
*************************
فى اليوم ده روحت عند سيده فاضله بحق من اهل السويس جوزها مات فى حرب 73  بجد ست تحسسك أن هى دى الست المصريه 
بجد والله 
ست ربيت عيالها كويس جداااااااا عندها فكر عالى جدااااااااااا فى تربيه عيالها وبطرق تربوبيه يمكن الى واخدين درجات عاليه فى التعليم ما تخطرش على بالهم 
من ضمن المواقف الى سمعتها منها 
وهى بتحكى لما جوزها مات وبقت هى المسؤوله عن مصروف البيت كانت بتجمع عيالها حواليها وتقلهم احسبوا انتم احنا محتاجين ايه وهيفضل كام وكده علشان تعلمهم المسؤليه وتخليهم يشاركوها فى كل حاجه 
والله يا جماعه مكان الست الطبيعى فى البيت مش فى الشغل ولا التعليم العالى احسن علماء طلعوا من بلدنا كانوا من امهات ربات بيوت واميين بس ستات عندها فكر راقى عندها وعى بعيالها 
حاليا مش هنقدر نرجع تانى الستات للبيوت بس لازم يتحط مواد دراسيه لتعليم الفتيات والذكور معا يعنى ايه اسره وتربيه اطفال وتحمل مسؤليه علشان الاجيال الى طالعه مش تطلع ضااااااايعه.
********************
الست الفاضله دى اتكلمت عن جوزها صراحه هالنى كلامها 
ليه ؟ 
اقلكم 
بتتكلم عليه بكل حب مع انها يمكن معشتش كتير معاه بس بتتكلم عليه وكانها عاشت معاه 100 سنه بتفتكرله كل مواقفه الحلوووه 
فكرتنى برده بإن مابيفضلش بعد موت الانسان غير سيرته الحلوه وخاصه لو كان زوج او زوجه 
يسلااااااااااام  لما زوج او زوجه يكونوا كويسين مع بعض وربنا يقبض روح واحد منهم حلو قوووى ان التانى يفتكرله الحلو مش الوحش ومايقلش بلا هم كانت عامله ازعاج او بركه ريح واستريح 
الكلام ده علشان الازواج الى بيتفننوا فى انهم يحرقوا دم بعض اتقوا الله فى بعض علشان لما تمشى الاخر يفتكرلك الحلو مش الوحش 
ماهو اصله مابيفضلش غير السيره الحلوه والمواقف الجميله.
**********************
كل موقف او خاطره من الى فاتوا يستحقلهم موضوع لوحده لانهم اكبر من مجرد خواطر .
القاكم فى خاطره جديده 
>>> وش برئ بيدل على الهدوء النفسى علشان بس لسه على الصبح.

الجمعة، مايو 08، 2009

إن كيدهن عظيم


مساء الخير على اخونا الرجاله الغلبانين 
المهم افتكرت حاجه جت فى بالى 
وهى ايه دهاء المرأه 
اه لؤمها يعنى 
كتير من الرجاله بينخدع فى دهاء الست مش عارفه ليه 
سيبك من ان الست  ممكن تكون طيبه او شريره او مثقفه او أميه 
انما اى نوع من انواع الستات تلاقى عندها كميه دهاء رهيبه 
يعنى اغبى ست فى رائ ممكن تخدع اذكى راجل 
الى بيخلنى اقول كده ليه؟؟
مواقف كتير اتحطيت فيها الاقى الى قدامى بيستقل بمخى اكمنى يعنى مش من هواه الخروج ولا ليا فى الكلام الفاضى الاقيه يستقل بمخى ويقول بس انا هقدر اضحك عليها وفى الحقيقه انا الى بستعبط بمزاجى نياهاهاهاه ......
على فكره انا فى رائ ان الدهاء واللؤم  صفه بتتولد مع المرأه يعنى نقدر نقول وراثيه ممكن تبقى شديده وممكن تبقى خفيفه بس الاكيد انها عند كل الستات فى اى مكان على وجه الارض .
فى ايه فى القران بتقول > إن كيدهن  عظيم 
وده بيقابل برده لؤم المرأه 
يعنى الستات مثلا الى بينضحك عليهم فى اى حاجه سواء علاقات عاطفيه او تجاريه او اى كانت ساعتها بيظهر عندها الدهاء وحب الانتقام بس بطريقه مبتكره مش زى الرجاله طرق تقليديه فى الانتقام 
لو بصيت على اغلب جرائم القتل المشهوره هتلاقي الستات فيها بينتقموا بطرق جديده جداااااااا 
الكيس والساطور _ تدويب الانسان فى بوتاس ومن ثم فى المجارى _ الدفن تحت الارض > ريا وسكينه 
شئ عجيب وغريب عندنا قدره رهيبه على الاخذ بالثأر والتفكير فيها بشكل جديد اعتقد ربنا عوضنا بالدهاء بديلا عن القوه الجسمنيه الى بيتميز بيها الرجال وإن كان الرجال قوتهم بتضعف مع تقدم السن فإن قدره دهاء المرأه اعتقد فى رائ بتزيد بتقدم العمر لزياده الخبرات الحياتيه فا بيزيد معها الدهاء. 
حاجه اخيره ودعوه صادقه 
ياريت يارجاله ما تستقلوش بلؤم الستات ابدااا وما تأمنوش مكرهم ودهائهم 
واوعوا تفتكروا ان اى ست ممكن يعدى قدامها حدث او موقف او حتى كلمه من غير ما تفسروا >>> بالذات لو مع الرجاله الست مخها واحاسيسها ومشاعرها وحواسها بتنتبه فى تعاملها مع اى رجال وتلاقيى مخها بيشتغل دينمو ساعتها وممكن تفهم الطايره زى ما بيقولوا على عكس لو بتتكلم مع ست زيها 
حاجه اخيره بجد الزوج الى ممكن يكون فاكر انه بيخدع زوجته بيبقى واهم بجد 
بس كده ومش عندى حاجه تانيه 
يمكن بكره ولا بعده اكتب تانى 
حاسه انى ليا رغبه انى اكتب بس عن ايه الله اعلم 

الثلاثاء، مايو 05، 2009

كل شئ هيبقى حلو ان شاء الله وهيمشى حسب الخطه


السلام عليكم 
لقيت وقت فاضى قلت ادخل اشوف المدونه والف على المدونات الشقيقه وبالمره اخد رائيكم فى حاجه <<< استغلال 
احمم المهم 
مش عارفه ابدء منين ولا منين 
كان فى كم حاجه كنت عايزه اقلهم 
اولها 
من فتره قريبه قريت كتاب اسمه ذا سيكريت المهم الكتاب ده فكرته كلها عباره عن انك زى ما هتتخيل حياتك هتمشى  بمعنى اذا تخيلتها حلوه وانك مثلا بقيت من افضل الاطباء فى العالم  هتعمل ده فعلا واذا تخيلت ان حياتك هتفضل فاشله وان حظك الوحش هيفضل ملازمك  هيحصل ده فعلا ليك 
لان الكتاب بيقول ايه ان الطاقه الايجابيه بتاعه التفكير هى الى بتخلينا نتحرك ناحيه الايجايبه وفى الطريق الى هيحقق لينا الى بنتمناه 
والعكس بالعكس __ انا شفت الفيلم مترجم والصراحه الى كان مترجمه كان حاطط تعليقات ايمانيه رائعه وده لسبب 
ان كل الى هما اتكلمو فيا بيدور حوالين العقيده السلاميه او جوهرها بمعنى اصح يعنى ( الدعاء - التفاؤل - حسن الظن بالله  - العمل والاجتهاد والنتيجه على الله ") كل دى حاجات اتكلموا فيها بس طبعا مش بشكل دينى لا من وجه نظر ناس غربين عمليين 
اعتقد فى رائ المتواضع ان الناس دى لو عرفت الدين الاسلامى صح هتعرف انه الدين الخاتم المناسب لكل العصور واعتقد برده ان الدين الاسلامى لو اتشرح برا فى البلاد الاروبيه بشكل واضح ومناسب ليهم هنلاقى اعداد غفيره دخلت فيه 
عموما انا بستعجب على الناس الى بتقول الدين ماينفعش نمشى بيه الساسيه او الدوله والحكم 
واخيرا انصحكم فعلا تدورا على الكتاب وتقروه  وترجموها على الصوره الاسلاميه 
على فكره الفيلم والكتاب من حوالى سنه بس انا لسه قرايهم قريب واقلت اقلكم عليه 
الشئ التانى بقى 
كنت طالبه منكم استفتاء صغير 
وهو عن منتدى لانى ناويه ان شاء الله اعمل واحد وكنت عايزه اعرف كام نقطه وياريت مش عايزن الناس البخله بالافكار والنصايح يعنى عايزين نشوف ما تجود به قرائحكم 
المهم 
1/ ايه اكتر حاجه ممكن تشدك لمنتدى ؟
2/ ايه اكتر حاجه ممكن تخليك تستمر فيه وتابعه؟
3/ايه اكتر حاجه ممكن تخليك تبقى نشيط فيه يعنى ترد على مواضيع وتكتب مواضيع ؟
4/ايه اكتر حاجه تخنقك من المنتدى ؟
5/ ايه اكتر قسم بتفضله فى اى منتدى ؟
بس كده 
وشكرا على حسن متابعتكم .