مساء الانوار على الجميع
النهاردة وقعت فى ايدى مدونة عايزة اتجوز الصراحة المدونة تحفة بجد مش ليها حل بس هى الصراحة خلتنى اكتب الموضوع دة
فكرت مع نفسى على السريع كدة وسالت نفسى هو انا لية بالظبط عايزة اتجوز ؟؟؟؟؟؟؟؟؟
اسباب الجواز فى رائ يا اما
1/ استقلال وانها يكون عندها بيتها المتحكمة فية وست البيت ومسئولة عن كل حاجة
2/ احتياج عاطفى ونفسى
3/ احتياج مادى
4/ حب الاطفال وحب التربية وتنشئة الاطفال
5/ واجهة اجتماعية وانى واحدة سوقها ماشى وبيجلها عرسان واتجوزت
6/ علشان الجميع بيتجوز واحقق كل الاسباب الى فاتت
انا عن نفسى السبب الرئيسى لانى عايزة اتجوز انى انعم بالاستقلال وبعدين الاحساس العاطفى وبعدين ممكن الاطفال
يعنى على سبيل المثال انا لو توفرت ليا عامل الاستقلال ممكن استغنى عن الجواز لانة الصراحة شايفة الجواز دة عملية فى الغالب مش بينوبنا منها غير حرقة الدم والاعصاب الراجل مقرف والعيال متعبة والاهل مش مريحين نفسهم عمالين يتدخلوا فى الكبيرة قبل الصغيرة
شئ بجد متعب بس لو انا بقى قلت فكرتى دى لحد اكيد اكيد الناس الى هتبصلى هتقول انى واحدة معقدة او انى بعمل نفسى مش هاممنى وانا من جوة محروقة انى مش متجوزة بس مش عايزة ابين ,
ياترى الجميع عندة سبب فعلى للجواز ولا انا بس الى بفكر فى السبب الفعلى ولا الجميع عايز يتجوز وخلاص علشان الكل بيتجوز اشمعنى احنا ؟
مش عارفة اهى كانت فضفضة ممكن تكون مش ليها لازمة انها تنكتب بس قلت امشى ايدى على الكى بورد هههههههههههه
هناك ٦ تعليقات:
شوفى بقى يا ست جيهان هو الجواز ده مرحلة طبيعية و مهمة فى حياة الإنسان زى باقى المراحل من أول مولود ثم طفل ثم صبى ثم شاب و هكذا و بعد مرحلة الجواز تأتى مرحلة الأمومة و كل مرحلة من المراحل دى لها طعمها الخاص فى وقتها و ما ينفعش تحرمى نفسك من متعتها.
بس الدنيا طبعها إن مافيش حاجة من غير ثمن مفيش حلاوة من غير نار
الشاطر يعرف إزاى يكبر مكسبه منها من غير ما النار ما تحرقه بس لازم يدفع الثمن ممكن يكون الثمن مسئوليات زيادة بس غالبا ممتعة
و فى النهاية حاولى تخلى الجواز ده نوع من الإستثمار
أيوه إستثمار بس فى الجنة
يعنى تحاولى تتجوزى واحد يساعدك على إنك ترضى ربنا و تدخلى الجنة معاه فى الآخر يعنى حبكم يستمر لما بعد الممات فى الدنيا و فى الآخرة و يبقى ده الحب الحقيقى و الجواز السعيد الدائم
شوف انا هقلم على حاجة الجواز فى حد ذاتة متعة انا مش بنكر دة بس المشكلة والى بتخلى الجواز شئ سئ جداااااااااااا هو ان الزوجين بيكونوا مش متفقين مع بعض يعنى يا اما الزوج رامى المسئولية كلها على الزوجة وساعتها الزوجة هتقول انا اية الى خلانى اتجوز او الزوجة بتحمل الزوج فوق طاقتة ودة مثال يعنىمن ضمن امثلة كتير
يعنى مثلا انا لو لقيت انسان هيكون كويس متعاون ومشارك اكيد مش هرفض انما المشكلة ان الجواز عامل فعلا زى البطيخة او انت وحظك يا تطلع حلوة يا تطلع قرعة .
وبخصوص الاستثمار فادة اكيد ممكن يحصل لو اتجوزت واحد فى اية عيب صعب وانا احتملتة راضية علشان انول رضا ربنا .
وفى النهاية انا طبعا اتمنى انى اتجوز واحد يعنى على امور دينى ودنياى وان يكون فى حب مستمر .
انما الى مش اتمناة انى اخد واحد يقرفنى واعيش حياتى معه متعكننة دايما ساعتها هيتبقى حياتى من غير جواز اريح بكتيييييييييييييييييير .
مرحبا بكى أنا بعت شوية بوستات إيه رأيك تقرأيهم
انا هقول ان فعلا الجواز ملوش لازمة يا جماعة انا واحد من الناس اللى رافعة شعار مش عاوز اتجوز ابدا ربما لو هيكون سبب يخلينى اغير راى هيكون الاولاد بس فعلا فى حاجات كتييييير نفسى اعملها قبل حتى ما افكر فى الجواز
جود لك جيهان هانم.........
د/ ماجيك الجواز مهم
بس امتى نقول مش لية لازمة لما يكون هيبقى كلة مشاكل وتعب وقرف
انما لو انت لقيت واحدة ترتبط بيها تكون ليكوا اهتمامات مشتركة وقريبين من بعض اكيد الجواز ساعتها هيختلف ويكون جميل
بجد المشكلة مش بس انى الاقى واحدة انما انى اقتنع بفكرة الجواز من اساسه
الجواز مسؤلية كبيرة انا عن نفسى مش مستعد اتحملها على الاقل لحد النهاردة ده تفكيرى
إرسال تعليق