يا هلا فيكون جميعا
دى تكملة البوست الى فات
وهى عبارة عن ......... اقروا وانتى تعرفوا بلاش رغى كتير
زمااااااااااااااااان كنت بستنى اغانى ام كلثوم على اذاعة الاغانى فى السهرة الساعة 11وكنت ادنى افكر يا ترى اية الاغنية الى هتتذاع ياترى اغنية بحبها ولا لا وكنت اتمنى ان يكون عندى كل اغانى ام كلثوم اسمع فيها زى مانا عايزة وكل الاغانى القديمة ولما جبت الكمبيوتر طبعا بقى عندى كل الاغانى القديمة بس للاسف ما بحسش بنفس المتعة الى من الراديو يمكن نسبة المتعة لا تتعدى 30فى المية
بردوا زمااااااااااااان كنت احب القراية قوى واحب المجلات واشترى كتب وكنت اتمنى يبقى عندى مكتبة كبيرة فيها كتب لكل الكتاب وكنت بحس بمتعة جميلة جدا فى القراية ولما جبت الكمبيوتر بردة بقى عندى كتب لكتاب كتير واقدر اجيب اى كتاب انا عايزة بس للاسف لما جيت اقرى الكتب ما حستش باى متعة بالعكس حسيت انة ممل جدا وان متعة القارية تمكن فى كتاب تقدر تمسكة وقت مانت عايز وتقلب فى صفحة براحتك ॥
بردة زمااااااااااااان كنت احب اتفرج على الافلام الاجنبى على القناة التانية وكمان البرامج بتاعة هذا المساء وبانورما فرنسية واخترنا لك وكنت احب اتفرج وياترى هيجبوا فيلم اية وياترى هيكون حلو ولا لا ولما جبت الكمبيوتر بقى عندى افلام واقدر اتفرج على اى فيلم بس اعتقد ان متعتة مش بردة زى متعتة الفيلم الى تقعد تستناة اسبوع او اكتر علشان تتفرج علية ...
بردة زماااااان كنت بحب انى ادون على الورق اى حاجة واقطع جرايد ولما جبت الكمبيوتر وجيت امارس موضوع النوتبوك ليقيتة ممل جدااااااااااا ولقيت ان الاسهل هى الورقة والقلم تمسكهم وقت ما انت عايز وتشتطب وتشخبط براحتك ....
بردة كتير قوى بقضى وقت على النت اكلم اصحابى واضحك معاهم واهزر بس بيجى وقت بحن لانى اشوفهم ويشفونى واتكلم معاهم وجها لوجة واخرج واتفسح معاهم بعيد عن الكمبيوتر الى تقريبا متعتة بتبقى وقتية وبمجرد ما بيتقفل خلاص كل المشاعر بتتقفل معاه
امممممم انا ما انكرش ان الكمبيوتر مهم جدااااا ومهم بالنسبالى وانا عن نفسى ما اقدرش استغنى عنة ابدا بس بيجى وقت واكتشف ان الحياة مش معقولة كلها هتبقى كمبيوتر ونت ومتعلقة بية لازم الانسان ينفصل شوية عنة ويرجع للقديم تانى سواء بقى كان قراية كتاب او خروجة مع صديق او حتى كتابة مذكرات على الورق من تانى او تشغيل الراديو مرة بليل على اذاعة كنت بتحبها قبل ما يكون عندك كمبيوتر
اعتقد ان الرجوع للقديم مفيد للصحة النفسية جدا للانسان لانة ساعتها هيديلة شعور بالسعادة غير قابل للوصف
مش عندى حق ولا اية انتم اية رائيكم فى الموضوع دة ؟؟؟؟؟
هناك تعليقان (٢):
الله الله الله ع البوست ده....رغم انه بسيط وممكن يكون كل الناس حاسة باللي انتي كاتباه لكن الجميا انك كتبتيه وكتبتيه صح ....بس على فكرة انا لسة بحافظ ع الحاجات القديمة اللي بحبها يعني انا فعلا بدات اني اجمع قصص اجاثا كريستي بشتري واحدة كل اسبوع...وهاري بوتر ...وفعلا حاولت اني اقراهم ع الكمبيوتر لكن بجد زهقت من قبل مقرا....وكمان الافلام انا بحط تقريبا 20 جيجا افلام مبتفرجش غير على فيلم واحد منهم ودايما ادور ع التلفزيون على فيلم حلو اتفرج عليه الا فيلم واحد وهو legends of the fall لانه للاسف مبيجيش خالص مش عارف ليه فبضطر اتفرج عليه كل فترة ع الكمبيوتر...ملحوظة انا مبحبش ام كلثوم بالمرة....وبجد برافو ع البوست.....ومن فات قديمه تاه
صباح الخير يا على وميرسى كتير على كلامك الى بجد بيفرحنى
وانا بحييك انك فعلا بدات تخرج من دوامة الكمبيوتر وتستأنف حياتك القديمة من تانى , لانى لغاية دلوقتى تقريبامش عارفة اخرج من دوامة الكمبيوتر والنت وبحاول انى استرجع بعض من القديم الى كنت بحبة
>>>>>تعالى هنا حد ما يحبش ام كلثوم !!!!!!!!!!!!!!
إرسال تعليق