خواطر

خواطر مستخبيه

2011-08-24T02:59:00.005+02:00

راجعت النهارده وقريت تقريبا كل مقالات المدونه هنا تدوينه تدوينه بقراها بالتفصيل وفى حاجات اكتشفت انى قلتها وتنبأت بيها وحصلت فعلا زى بوست كنت كاتباه انى حاسه انى داخله على مرحله صعبه قوووى وان ربنا بيعدنى علشان اقدر اعديها وفعلا دخلت المرحله دى وعديتها بفضل لله _ الحمد لله _ احيانا فعلا الواحد بيبقى احساسه صح.

انبسطت قوى لما قريت التدوينات تانى حسيت انى بفتكر نفسى وبراجعها, يمكن هى دى فايدة المذكرات أن الواحد بيقرى وبيكتشف نفسه لان احيانا البنى ادم بينسى نفسه وبينسى افعاله واتصرف ازاى وعمل ايه وغلط فى ايه الواحد بينسى غلطاته بسرعه قوووى ويمكن من فوائد المذكرات ولونى مش بمارسها انها بتفكرك بافعالك علشان تراجعها كل فتره وتحسن من نفسك ولونى اصلا اشك ان حد من الى بيكتب المذكرات بيرجع يقراها تانى باعتبار ان الى اتكتب اتكتب خلاص.

البنى ادم مهما كان حواليه من ناس حتى لو بيحبوه فهو وحيد, وافضل قرب وافضل ونس هو الى بيكون فى قرب ربنا. اكتشفت فى تعاملاتى مع ناس كتير إن المصلحه الشخصيه بتعلو فوق اى حاجه تانيه, إن الى يهمك ممكن مايهمنيش والى يهمنى ممكن مايهمكش وبالتالى كل واحد يخليه فى نفسه افضل, مش أنانيه بالعكس دا إيثار إنك تحجز كل الى الوحش واللخبطه الغريبه والعجيبه عن المحيطين بيك علشان ما تضايقش حد فا دا إيثار فى ظنى يعنى يمكن يكون ظن غلط بس معرفش ليه كل ما يمر وقت اكتشف أنه أفضل الحلول الممكنه علشان تعيش وأنت مرتاح.

إعمل الخير وأرميه البحر, اوعى تفكر فى اى خير بتعمله ولا أى واجب عليك بتقوم بيه والا هتتغر فى نفسك ومش هتقوم بيه بعد كدا, أفضل حاجه إنك تنسى الى بتعمله.

الوحده والهدوء والعزله مفتقداهم جدااااااااااا بمعناهم الحرفى والمعنوى.

عمرى ما كنت اتخيل ابدااااااا ولا اتصور انى اتغير واغير من حاجات مقتنعه بيها مليون فى الميه عمرى ماكنت اتصور انى اتخلى عنها ولكن وكالعاده البنى ادم ماينفعش يحكم على حاجه او على صفه او مبدء عنده الا لما يختبره, اختبره ونجح فى الاختبار تبقى الصفه دى عنده سقط فيها يبقى يلغيها وما يذكرهاش تانى_ كانت فى مقوله لمصطفى محمود اعتقد بتقول فيما معناه ان الانسان ممكن يفتكر ويظن بنفسه الظنون انه يقدر يعمل وانه كذا وكذا وكذا ولما يتحط فى المواقف الى تختبر الحاجات يلاقها طارت وبالتالى يفضل ان الانسان ما يحكمش على حاجه فيه مبدء او صفه الا لما يختبره الاول غير كدا وقبل فتره الاختبار فهى صفة قابله للتغير اى كانت الصفه دى او المبدء دا.

واخيرا محدش هينفعك غير نفسك حتى لو كان ابوك وامك اقرب واحب ناس ليك, فاشتغل واسعى وحسن نفسك علشان نفسك مش علشان اى حد تانى.

أمسك حراااااااااااااااامى

2010-07-29T10:30:00.002+03:00

قووووووووم إيه فى يوم من الايام قفشت نفسى حتة قفشه بعمل إيه ؟؟؟؟؟؟؟؟!!!!!!!!!!!!

قولوا انتوا بقى ى ى ى

اقلكم انا ال ايييييييييييه قفشت نفسى بحسد يا نهاااااااااااااااااااااااااااااااار مش فايت هى وصلت للحسد

اه اه مش تستغربوا اصل الواحد لو فتش فى نفسه كويس قووووى وبصدق هيلاقى نفسه بيعمل ويفكر فى حاجات ليها العجب

ايوووووووووه صدقونى المشكله ان انا ماكنتش واخده بالى خاااااااااااااالص ان الافكار دى ماهى الا حسد فعلا

والى مش عارف الحسد هو ايه هقلكم علشان نبقى على نور ان الموضوع مش هين

الحسد: هو تمنّي زوال النعمة عن الغير .

ايوه فى حاجه اسمها الغبطه وهى انك بتتمنى النعمه الى عند الغير بس ما بتتمناش زوالها ودى مافيهاش اى حاجه بل انا عن نفسى بعتبرها دافع للشخص علشان يحقق الى نفسه فيه

انما المصيبه بقى ان الحسد بيبقى تمنى زوال النعمه عن الشخص وممكن تكون لاسباب كتيره جدااااااااااااا ممكن كرها فى الشخص

وممكن علشان محدش يبقى احسن منه ويبقى كل الناس زى الحاسد وممكن تكون رغبة بحته فى الشر ورؤية الناس بتعانى وممكن حاجات كتير قوووى ,, ما علينا من الاسباب

الى عايزه اوصله فى كام نقطه اخيره بقى

ان كل انسان فينا طبعا معروف ان فيه الخير والشر جواه ومحدش صافى تماما من الصفات الشريره زى الحسد والحقد والغيره والكره ووووو

بس عزاء الانسان الوحيد ان الصفات الكريهه دى ما تبقاش هى الغالبه عليه وما تبقاش هى المسيطره وانه اول ما يكتشف ان فى واحده بدأت تظهر بشكل واضح على طووووووووووول لازم يعالجها والا هتجر وراها كل الصفات الوحشه التانيه ويتحول الانسان فى الاخر لانسان وحش شرير

نقطه كمان هقولها ان ربنا رحمن رحيم بمعنى ان الانسان جواه تمنيات كتيره بعضها سئ وبعضها حلو واهم حاجه ان السئ ما يخرجش بره دايرة التمنى والا هتبقى كارثه بمعنى الكلمه وده لان فى ناس ربنا يحفظنا منهم يارب ممكن تحسد اى بتتمنى زوال نعمه معينه عن الاخرين وبتسعى جاهده لزوالها فعلا عن الشخص مش مجرد امنيات لا دى بتحاول تحقق الامنيات دى وربنا يحفظنا من الناس دى وعلى فكره الناس دى من عينة الى بيروحوا للسحره والدجالين علشان يعملوا اعمال سفليه وسحر لناس تانيه يؤذوهم بيها

كمان فى حاجه هقلها ان الانسان ممكن يكون بيحسد وهو اصلا مش واخد باله وبتحصل لينا كتير يكون حد بيبص لحاجه بأعجاب ويلاقيها مثلا اتكسرت وقعت اتخبطتت وهو يحرج ويقول والله مش بحسد ماكنش قصدى وفعلا ممكن الانسان ما بيكنش واخد باله وعلشان كدا رسولنا الكريم علمنا اننا لما نشوف حاجه عجبتنا عن حد نقول

قال النبي صلى الله عليه وسلم "إذا رأى أحدكم من نفسه أو ماله أو من أخيه ما يعجبه فليدع له بالبركة فٍان العين حق "

وكمان الدعاء بالبركه مش بس لما نشوف حاجه عجبتنا عند اى حاجه ده بيوطن نفسنا اننا نتخلص من اى حاجه جوانا وبيدربنا على اننا نحب الخير لبعض وكمان ياريت ما نزعلش لما حد يجى يتكلم على حاجه ليه ويقول مشاء الله الله اكبر هو كدا بيحمى نفسه وبيحمى الى قدامه من الوضوع فى ذنب الحسد

حاجه قبل الاخيره الانسان فعلا كل فتره محتاج يفتش فى نفسه ويعالجها ويصفيها من الشرور الى جواه ويدعى ربه انه يساعده وينقيه فعلا من الشر الى جواه

الحاجه الاخيره بقى مقولة للحسن البصرى بتقول

"ما من آدمي إلا وفيه الحسد، فمَن لم يجاوز ذلك إلى البغي والظلم لم يتبعه منه شيء".

هوامش متعلقه بالموضوع علشان ندرك إن الموضوع مش هين

** تنبيه** الغبطة هى أول درجة من درجات الحسد فينبغى على الانسان ان يعالج نفسه ولا يطلق لها العنان لان بين الغبطة والحسد شعرة.

الحسد مرض نفسى يؤذى الحاسد وضرره على الحاسد أكبر من ضرره على المحسود غالباً. لذلك امرنا الله تعالى ان نتحصن ونستعيذ به من شر الحاسد.

ذم الحسد:-
• روى الإمام مسلم عن ابى هريرة ان رسول الله صلى الله عليه وسلم قال:" لا تباغضو ولا تحاسدو ولا تجسسوا ولا تحسسو ولا تناجشوا وكونوا عباد الله إخواناً".
• وورد عن عوف بن عبد الله - وهو من كبار السلف – قال لأحد الاُمراء – الفضل بن المهلب -:"انى اريد ان أعظك بشئ: إياك والكبر فإنه أول ذنب عصى اللهَ به ابليسُ.
وإياك والحرص فإنه أخرج آدم من الجنة.
وإياك والحسد فإنه قتل ابن آدم أخاه حين حسده ثم قرأ:" وَاتْلُ عَلَيْهِمْ نَبَأَ ابْنَيْ آدَمَ بِالْحَقِّ إِذْ قَرَّبَا قُرْبَاناً فَتُقُبِّلَ مِن أَحَدِهِمَا وَلَمْ يُتَقَبَّلْ مِنَ الآخَرِ قَالَ لَأَقْتُلَنَّكَ قَالَ إِنَّمَا يَتَقَبَّلُ اللّهُ مِنَ الْمُتَّقِينَ" [المائدة : 27].

ذكرى

2010-05-11T18:08:00.002+03:00

..... ولإنه ما بيفضلش من الانسان غير ذكراه والى عمله فى دنيته لقيت انى حابه اتكلم عن والدى وعن حياته حاسه انه واجب عليا اقول حسناته ومميزاته حتى ولو ماكنتش معايا وكانت مع غيرى بس حاسه انه من الواجب اننا نفتكر الناس الكويسه ونتكلم عنها يمكن حد يتعلم منهم او يترحم عليهم ...

والدى توفى بالظبط من شهرين, كنت مرتبطه بيه جداااا وهو كذلك وفاته على قد مانا تقبلتها بحزن الا انى حزينه جدااا على فرقاه والحزن فى نظرى مش مظاهر ده احساس ياما ناس مثلت الحزن فى المظهر وهى جواها ولا حزنان ولا حاسس بأى حاجه, إحساس الحزن ما ظهرش عندى بشده الا الايام دى لما بدأت استوعب ان خلاص معنتش هشوفه تانى خلاص , ماكنتش حاسه بفرقاه فى الاول قوى زى دلوقتى حاسه بفتره عصيبه حاسه انى مفتقداه بشده حاسه على قد ما كنش بينا صحوبيه واسرار انما كان فى بينا روح حلوه مفتقداها شخص كان بيساندنى فى الحق ومايسعدنيش فى الغلط, شخص لما مات سمعت عنه كلام كتييير قووووى حلو من الناس الى حواليه, شخص ماعرفتش قيمته الا لما مات وراح, بجد الحب ده مش مظاهر ولا اى حاجه الحب ده احساس انا حاسه الى الان انى خايفه عليه بس بصبر نفسى وارجع اقول ربنا ارحم بيه مننا, كان نفسى يعيش واسعده واساله انت راضى عنى ولا لا؟ كنت اتمنى اعبرلوا عن حبى بجد.

اكتشفت فى وفاة بابا حاجات كتيره ممكن مش كبيره بس كانت اول مره اكتشفها, لما والدى ادفن بجد كان نفسى اوطى على التربه ابوسها واعيط عليها بجد مش شغل مسلسلات لا ده بجد بيبقى احساس صادق, لما بقول انى نفسى كنت اعبرلوا عن حبى مش مجرد كلام ولا شغل افلام لا والله اكتشفت ان الافلام والمسلسلات اى حاجه بننكرها عليها ونقول شغل افلام عربى وهندى ده علشان احنا بس معشناش الموقف ولما بنعيشه بجد بكل تفاصيله بنعمل زيهم, يااااه انا لسه فاكره اخر يوم شفته قبل ما يروح المستشفى ولسه فاكره مسكت ايديه ليا وهو فى المستشفى حاسه انى فاكره كل حاجه متعلقه بيه كانها لسه حاصله دلوقتى.

اكتشفت حاجه مهمه قوووى ان الانسان ساعة وفاته بيتعرف بجد اذا كان انسان صالح او لا , والدى زى اى انسان اكيد كان ليه عيوب وتصرفات ممكن تكون غلط وممكن انا نفسى كنت بنكرها عليه, بس اكتشفت ان الانسان ربنا مش بيحسبه بميزانا إحنا ربنا ليه ميزان تانى خالص بيحاسب بيه البشر ,لقيت ان محدش يجروء يقول الانسان ده هيدخل جنه او نار محدش يعرف الانسان ده من جوا هو ايه ونيته ايه

افتكرت قصة البغى الى اسقت كلب ودخلت الجنه هى بغى وواكيد الكل فى زمانها كان بيقول هتدخل النار دى بغى اكتر من كدا ايه واعتقد انها سقت الكلب ومحدش شافها بس ربنا شافها وحاسبها على قد نيتها, انا شايفه ان محدش يجروء يقول ده هيروح فين وده هيروح فين وربنا هيحاسب ده ازاى وده ازاى, يعنى بإختصار كل واحد يخليه فى حاله ويدور على حياته هو.

كنت بتكتب الكلام ده علشان اقول مميزات والدى وحسناته لقيتنى كتبت حاجات تانيه بس كتبت الى حسيت بيه, انا مش كاتبه المقال ده لاى شئ الا انى شايفه ان فى ناس كتير بتمر فى حياتنا مش شرط اب او ام او قريب ممكن يكون جار او حتى مدرس ابتدائى بيكون ليهم اثر كبير فى حياتنا ومن الصعب انهم يتنسوا شايفه انهم لازم نفتكرهم ونتكلم عنهم على الاقل اعتراف منا بجميلهم والاثر الى سابوه فينا.

وربنا يرحم موتى المسلمين جميعا ويغفرلهم ويحسن ختامنا اجمعين .

اذا عمل احدكم عملا فليتقنه

2010-02-02T20:07:00.005+02:00

بدون مقدمات

حقيقى بستمتع بالمواقع الاجنبيه اى نعم انا لغتى الانجليزيه ضعيفه جدا يعتبر بس حقيقى اى موقع اجنبى بتحس فيه بالاحتراف والفن والجديد والتميز كعادة الغرب دايما ان حاجتهم بتتعمل بشكل مميز ولافت للنظر نادرا اما تلاقى موقع عربى متميز بشكل جديد وبيحتوى على حاجات ملفته وجاذبه للنظر وتشدك باستمرار , حتى للاسف لما بنحب نقلدهم بنقلدهم بغشوميه زى ما بيقلوا تقليد يفتقر للتحديث والتميز زيهم احنا بنعمل نسخه منهم بس النسخه الوحشه مش النسخه المعدله , ولا عزاء لمواقعنا العربيه.

من فتره بقلب فى التى فى على غير العاده وصادف انى قلبت ووصلت لغاية قناة الجزيره للاطفال وحقيقى استمتعت بالبرنامج كان بيعرض مقتطفات من السيرك العالمى بصراحه فعلا سيرك عالمى ويستحق ان اى انسان يشوفه مش بس طفل لا لا خالص عروض واحتراف وفن مختلفين يخلوك تقعد منبهر قدامهم يخلوك مشدود ازاى بيعملوا كده سيرك احترافى مش عندنا سيرك اى كلام نص كم بمعنى اصح

دانا شفت من ضمن فقرات السيرك العالمى جايبين مدرب نمور النمور نضيفه وبتلمع ومتغذيه ومتخته كده مشاء الله يعنى على عكس الاسود والنمور الى عندنا تحس ان الجلد شويه شويه هيبقى تحت العضم من كتر ما الاسد جعان وهفتان وتحس ان شكله جربان كده

اعتقد اننا محتاجين نتعلم يعنى اى احترافيه او بمعنى اصح محتاجين نعرف ونطبق معنى الحديث الى بيقول اذا عمل احدكم عملا فليتقنه .

مبروك لمصر فوزها بكاس افريقيا على قد مانا فرحانه على قد مانا زعلانه اننا مش عارفين نبين شطرتنا وتفوقنا غير بس فى ا لحاجات الترفيهيه يعنى كوره تمثيل اغانى ,انما باقى المجالات الثقافيه والعلميه والسياسيه مش عارفين ناخد فيها الرياده حتى بعض المجالات الى كنا متفوقين فيها تراجعنا فيها ومعادش لينا حس ولا خبر ليه , ليه مايكونش التشجيع على جميع المستويات مش بس الترفيهيه ليه مثلا لاعبية الكوره المميزين مايعملوش نادى لرعاية المتفوقين رياضيا ويمويلوا المشروع ده ويبقوا بيساهموا فى تنمية مصر على الاقل فى الجانب الى يعرفوه ومش بعيد عنهم ليه كل مجموعه من المتميزن فى مجال معين ما يعملوش مشروع رعايه للموهبين ....... للاسف الفكره طبقتها مجموعه من الراقصات الشرقيات واعتبروا ان مهنتهم مهنه جديره بالرعايه وبدئوا يفكروا براعية الموهبين فيها , كنت اتمنى الاقى ان رعاية الموهبين تكون على ايد المميزين زى ما الغرب بيعمل اغلب الفنانين واغلب المميزين فى مجال معين تلاقيهم بيتبنوا مجموعه معينه من المتميزين ويرعوهم رعايه شامله ........ ليه احنا لا !!!!!!!!!!

,,,,,, كنت قريت مره جمله فى مدونه اخويا مراكبى فى احدى قصصه وحاسه انها بتتطبق فعلا

والجمله دى فيما معنها ان الظروف والاشخاص الى حولينا مش هى الى بتمنعنا من تحقيق احلامنا انما الحقيقه احنا الى بنحط الحواجز وبمنع نفسنا بنفسنا من تحقيق الى احنا عايزينه بمعنى ادق للى مش فهم قصدى

احيانا او دائما بقول لو الظروف بقت بالشكل ده الحياه هتكون افضل ولو بقت كده هعمل واسوى كذا وبتبقى فعلا ا لظروف زى مانا عايزه والاقى نفسى مابعملش اى حاجه وكان انا الى بمنع نفسى من التنفيذ مش الظروف من حواليا ..........

هل نعانى من الاضهاد ؟؟؟؟؟؟؟؟؟؟؟

2009-10-18T08:15:00.001+02:00

لا بجد يعنى

هو احنا الشعوب العربيه والاسلاميه بقي عندنا عقده الاضطهاد وان كل شئ حولينا معمول مخصوص علشان يدمرنا ؟

انا ملاحظه الموضوع ده من فتره كبيره وشايفه انه بيزيد بشكل غريب

اصل ايه بقى
بما انى من مرتادى عالم المنتديات العربيه فتقريبا بطلع على الجديد من الموضوعات الدارجه فيه
واذ بى كل فتره الاقى موضوع مثلا يكون عنوانه
احذروا قناه ام بى سى ثرى بتعلم الاطفال الصلاه المسيحيه !!!!!!!!!!!!!
وبتحاول تهدم عقيده الاطفال ووووو
الشئ الغريب او اذا كانوا هما متناسين ان اغلب برامج الاطفال مستورده من بلاد برا يعنى شئ طبيعى هيكون فيها اشياء مختلفه عننا سواء فى العادات او التقاليد او التعاليم الدينيه
انا مانكرش ان المفروض يكون فى رقابه من القناه على محتوى المعروض بس احنا كمان بلاش عقدة الاطظهاد دى تمسكنا
شئ كمان ناس تقلك قناة فتافيت ودى الى ميعرفهاش بتقدم برامج طبخ واكلات وحركات من دى واغلب البرامج فيها اجنبيه وبالتالى بعض اكلاتها ممكن يكون فيها خمور
يجى يقلك ايه احذروا قناة فتافيت بتحاول تدس السم فى العسل وتعودنا على الخموور
وبتهدم مش عارفه ايه وبتعمل ايه
انا بردوا معاهم ان لازم يكون فى رقابه على البراج والمعروض فيها
بس بلاش نبقى كل حاجه واخدينها على نفسنا وكأن العالم مالوش شغله ولا شغلانه غير العرب ووالمسلمين
اه احنا فى مؤمرات بتحاك ضدنا اوكى بس بلاش احنا كمان نشغل نفسنا وندور ويبقى شغلنا الشغال اكتشاف المؤمرات دى
خلينا ايجابين بمعنى اذا كانوا هما بيدسولنا السم فى العسل ما دسلهم احنا العسل فى السم
ما نطور احنا نفسنا ونقدم برامج ليهم
ما نعمل احنا كمان برامج تنافس برامجهم ويبقى ولا الحوجه ليهم
ما نعمل كارتون عربى اصيل على جوده عاليه زيهم ولا الحوجه للكارتون الغربى الى يمكن فيه ثقافه مختلفه ومش مقبوله عندنا
ما نعمل برامج طهى وحوار وتجديد زي برامجهم الناجحه ولا الحوجه لبرامجهم

هوا نا غلطانه وشايفه ان الامورعاديه ولا هما الى مكبرين الموضوع وشايفين ان فعلا كل الحاجات دى مؤمرات ضدنا

عمرك حسيت .............

2009-10-15T20:55:00.004+02:00

عمرك حسيت باحساس معين وحسيت انك نفسك تطلع لكل الناس وتقلهم الاحساس ده

عمرك حسيت انك عندك حماسه رهيبه انك تفتخر بالاحساس ده ومعندكش اى اهتمام برائ اى حد تانى اى كان سواء الرائ او الشخص

عمرك حسيت ان اخرة الصبر حلووووه

عمرك حسيت ان مافيش حاجه بتضيع ابدا عند ربنا وان كل لحظه اتظلمت فيها او حسيت بهوانك على الناس واستعوضت ربنا فى اللحظات دى وان ربنا بيعوضك عن كل ده

عمرك حسيت انك ممكن تعمل اى حاجه حتى لو كانت غيرمنطقيه علشان تحافظ على تعويض ربنا ليك

عمرك حسيت ان الفرصه فعلا ما بتجيش غير مره واحده فى العمر

عمرك حسيت ان الى فعلا بيترك شيئا لله ربنا بيعوضه بافضل مما بيتمنى

عمرك حسيت بقى بخوف رهيب ان ممكن التعويض ده يضيع منك باى شكل كان

عمرك حسيت انك مالكش ملجأ غير ربنا علشان يحافظلك على التعويض ده

عمرك حسيت بحلاوة الصدفة

عمرك حسيت انك مالك الدنيا بين ايديك

عمرك حسيت اى احساس من دول

اذا ماكنتش حسيتهم اصبر واكيد هتسحم فى يوم من الايام

واذا كنت حسيتهم زى مانا حاسهم حاليا

فبقول نحن اغنى اهل الارض الان فى هذه اللحظه

لان لحظات السعاده بقت قليله قوووى

واللحظه الى بيكون فيها الانسان قادر على الابتسام والسعاده

بتكون من اثمن واحلى اللحظات

,, وسورى لاى حد هيقرى البوست وممكن ما يفهمهوش او ما يحسهوش

بس بجد انا حاسه قووووى وحابه قووووى

وى الاخرماقدرش ما اقولش غير الحمد لله كما ينبغى لجلال وجهك ولعظيم سلطانك يارب العالمين

على جزيل عطائك

هاجس

2009-07-17T18:14:00.002+03:00

احساس غريب بقاله فتره معايا

حاسه انى داخله على مرحله صعبه

حاسه ان فى مسئوليات اكبر منى بتحط فيها او ضغوط بتحط فيها غصب عنى

حاسه ان زى مايكون ربنا بيعدنى لشئ صعب جاى قدام

حاسه انى فى مرحله تجربه واختبار ونموذج مصغر

للى ممكن يكون بعد كده , حاسه ان ممكن بعض احلامى

المرعبه او الصعبه عن المستقبل

ممكن تتحقق زى ما بعضها اتحقق

هممممممممم

مش عارفه ممكن يكون مجرد هاجس وممكن يكون حقيقه

وفى الاخر لن يصيبنا الا ما كتب لنا

ومحدش بياخد غير نصيبه والى اتقدر ليه

ولأن ربنا نفى عن نفسه صفه الظلم واتصف بالعدل فإى كان مابيحصل لينا فهو

مناسب لينا وليس ظلم لينا

ووووو مجرد خاطر مش اكتر

الناس المحبطين

2009-07-12T20:33:00.002+03:00

سلام عليكم

قبل البدايه كمان الصوره الى فوق دى تعبيرى ناحيه الناس الرخمه طبعا مش محتاجه انوه ان انا الى من فوق وناهيك طبعا انى مش محتاجه انوه ان ده مجرد ترميز ليس الا ولا يموت لواقعى بصله

من فتره .... الاول سورى لعدم الرد على اتعليق وده مش تكبر بس مش فاضيه وحاولت الغى التعليقات مش عرفت فالى يعرف يقلى ازاى وجزاه الله كل الخير يارب

المهم

من فتره كده كنت بقابل ناس متشائمه وظيفتها بس انها تحبطك وتجبلك اكتئاب وتحسسك انك مهما تعمل عمرك ما هتعحقق حاجه

المهم قوم ايه قلت او نسيت انى اكتب لغايه من كام يوم قابلت شخص مش عارفه اقول ايه الصراحه بس كل همه انه يعرفنى انى مش هحقق الى انا عايزه وان السبيل لتحقيق هدفى طريق واحد وهو بالنسبالى يكاد يكون شبه مستحيل

الغريبه انه بيبص للامور من خلال شخصه هو مش من خلال نظره محايده للامور او انه يبص من خلال وجه نظر الى قدامه

لا هو بيعمم احكامه على الجميع يعنى عاش تجربه مثلا وواحد كذب عليه يبقى كل الناس كذابه الا عدد قليل جدااا

بغض النظر انا مش قصدى انم على الشخص ده لا خالص انا قصدى انم على الصفه دى بالذات وهى صفه الحباط واحباط الناس التانيه

يعنى البنى ادمين دى مش بتكتفى انها تسكت لا دى كمان بتحبط الى حواليها وبتحاول تلبسهم نظاره سودا والاسم احنا بنبهكم للواقع

وبئس التنبيه الصراحه

يعنى يتقول خير يا تحط لسانك جوه بقك وتسكت

اذا ماكنش عندك حل للشخص الى قدامك تسكت

اذا كنت هتسببله احباط وضيق تسكت

اذا ماكنتش بتعرف تسكت فا مش عارفه ايه الحل الصراحه

كمان نوعيه من الناس قابلتها حقيقى نوعيه بايخه جدااا ورخمه وغلسه بجد

الى هما يسخروا من امكانياتك او من قدراتك اى كانت

وكأن هما يعنى الى اتولدوا وهما عارفين كل حاجه وفى ايدهم كل حاجه

وحتى ان كانوا اتولدوا وفى ايدهم كل الى بيتمنوا فا ده مش لانهم هما الى حققوا ده بسبب ناس تانيه تعبت وشقيت عقبال ما عملت ده

نوعيه بقى ارخم واغلس من دول كلهم

وهما الى بيرموا الى فيهم فيك !!!!

اةةةةةةةة

يعنى لو انت قصير وقصرت شويه كمان وهما قصروا اكتر منك يجولك ويقلولك انت قصرت ؟؟؟؟؟

تقولهم اه قصرت

اه احنا كمان قصرنا لا ومش يقف الحديث لحد كده ابداااااا ده لما يشوفوا حد تانى ده فلان قصر

وهاتك بقى كل مره يشوفك انت قصرت !!!!!!!

لغايه ما تحس ان السكوت هو افضل وسيله

وكفياه كده لاحسن بجد اتنرفزت جداااااااااااااا

ربنا ما يجعلنا من الناس الرخمه دى

صوره من اجمل ما يكون

2009-07-09T07:38:00.001+03:00

انانيه

2009-07-02T21:28:00.003+03:00

احيانا بتمر عليا اوقات اشوف المشاكل الى حواليا واحيانا اقعد افكر فيها واشغل نفسى بيها وازاى تتحل وازاى اساعد وفى نفس اللحظه الاقى جزء منى يقلى وانتى مالك ما تسيبك من مشاكل غيرك وخليكى فى نفسك وانتى هتعملى ايه يعنى , واقوم ارد على نفسى تانى واقول ماهو كده انا هبقى انانيه مابفكرش غير فى مشاكلى انا وبس ومش هاممنى غير نفسى

حقيقى احيانا ببقى انانيه وبحاول اخرج نفسى من كون انى افكر فى مشاكل غيرى واقول ماهى كده كده هتمر

او هى كده كده هتتحل ان شاء الله ولو مش اتحلت وانا مالى ماهو مش انا الى فى المشكله

بس ان جيتوا للحق اصعب المشاكل هى مشاكل الناس الى قريبه منك

يعنى هى دى اكتر مشاكل ممكن تشيل همها .....................................

أذان العشا بيأذن دلوقتى وافتكرت جزئيه وهو اننا دايما بنتهم غيرنا بالتقصير ودايما بنحط نفسنا مراقبين على غيرنا مع ان الواحد فينا بيبقى اكتر واحد عايز يتحاسب , من فتره اكتشفت انى بقيت عامله زى الرقيبه

اه يعنى كل ماحد يقول حاجه مش عاجبنى او يعمل حاجه مش عاجبنى الاقى نفسى تلقائى وعلى طووووول بغلطه اول شئ اقوم مغلطه الى قدامى وبعدين ارجع اقول فى نفسى ياترى انا لو كنت مكانهم ياترى كنت هتصرف بنفس النمط برده !!!!!!

صراحه احيانا كتير كنت بكتشف انى كنت هتصرف زيهم بالظبط ويمكن اسوء وده دليل قاطع ان كل واحد لما بيحكم على حد بيبقى حكمه مش منطقى لانه بيتكلم وهو معاش الواقع الى قدامه عايشه بكل ظروفه وملابساته ومشاعره وضغوطه زى بالظبط الناس الى بتتكلم على الفقر والناس الفقرا وسوء تصرفاتهم واجرامهم وهى ماتعرفش غير اسمه او على الاكثر ماشفتش غير صوره وماتعرفش ان الفقر بيعمل اكتر كمان من الى بيشوفوه وماعشوش حرمان الجوع والبرد والغيره من الناس الى عايشه احسن عيشه وهما مش قادرين,

معشوش يعنى ايه اكون محتاج لقمه ومش لاقيها وكمان بتهان علشان اقدر اخدها ويعنى ايه اب او ام تشوف ابنها بيتبهدل وهى مش قادره تعمله حاجه اكيد اكيد الى ممكن يعيش الظروف ده ممكن نتوقع منه اى حاجه ممكن نتوقع منه اجرام وسرقه واغتصاب ونصب واحتيال وبلطجه وتطرف والى اكيد اكتر منه اننا لو كنا مكانهم كنا هنتصرف زيهم مافيش شك

الى بقوله عن الفقر مايختلفش كتير عن حياتنا العاديه وتصرفتنا وتصرفات غيرنا انا مش بقول ان كل البشر لو اتحطت فى موقف واحد هتتصرف بشكل واحد وعلى الاساس ده لازم نلتمس العذر بس بقول ياريت مانفكرش فى تصرفات غيرنا كتير ونخلينا فى تصرفاتنا احنا

واننا نلتمس العذر للى قدامنا علشان على الاقل منبقاش فى يوم زيه او ربنا يبتلينا بشخص زيه ..

وكفايه كده

احنا الى بنعدى ولا نتعديش

2009-06-12T09:49:00.002+03:00

{{ طبعا ده مش تلفزيون بيتنا , بس اتمنى يكون هو _ تلفزيونا14 قدم ااقصد بوصه }}

صباح الانوار

امبارح تناهى الى سمعى برنامج فى التى فى عباره عن خناقه هو فى الاصل برنامج حوار تقريبا او بيعرض وجهات نظر مختلفه

بس ايه بقى حدث ولا حرج كان ناقص يخلعوا لبعض الجزم ويضربوا بعض ولا عاملين حساب انهم على الهوا ولا برستيج ولا اى حاجه خالص والمذيعه __ اقترح بعد كده يخلوه بودى جارد مش مذيعه لفض الاشتباكات __ عماله تقول لو سمحتوا يا جماعه ماينفعش كده سيبه يقول وجه نظره وكأنهم فى وسط الهيصه هيسمعوا كلامها منى منها كنت اقوم ادى كل واحد عشر تجواز اقلام على قفا كل واحد علشان يحترموا نفسهم شويه ويلموا الهيصه دى امال سابوا ايه لبتوع الشارع لما الناس المثقفه بتعمل كده امال احنا الناس العاديه نعمل ايه ؟ مش عارفه الصراحه ؟

ثم المذيعه اكيد عارفه ان الناس دى مشاغبه لازم يعنى تجبهم ولا علشان تزود عدد المشاهده

بأختصار احنا مش عندنا فن الحوار ولا فن الاختلاف ولا حتى اداره فن الحوار والله يرحم زمن الاعلام المسلى ايييييييييييييييييييييه < اصلهم كانوا زمان بيجيبوا رقصات فى التى فى تقدم عروض وفقرات حاجه اوريجينيل يعنى وعلشان نفرفش الشعب _ ايه الفسق ده _ >

يلا هى يعنى جت على البرامج الحواريه الى مش بنعرف نديرها ولا نعدلها كويس .

***************************

بخصوص انفلونزا الخنازير والطيور وماشبه

تقولش المصريين دول بيستعفوا نفسهم مع ان صحتهم كلها كيماوى عطس فى وش بعض ولا كمامات ولا ديالوا وعياشين حايتنا ولا كأن فى مرض اصلا

افتكر ايام انفلونزا الطيور كانت الدوله تحظر وتجيب ان فى حالات وفيات والناس قدامنا عاملين عشه قد كداااااااااااهوه ولا فى بالهم عادى جدا وكأن المرض مش هيجلهم

وبالظبط زى ما بيحصل دلوقتى

سيبك من حاله الهلع الى الكام واحد بيجى على التليفون يقلك انا مرعوب انا حرارتى وصداعى وكانى ومانى

انما اغلبيه الشعب ولا فى دماغه اصلا دا اذا ماكنش ان فى ناس اصلا متعرفش يعنى ايه انفلونزا خنازير !!

زيهم ولا يقل عنهم ابدا شباب مصر الى بيسافر ايطاليا على مراكب يسمعوا مليون مره فى التى فى ان الناس بتغرق وده نصب وبرده بيسافروا

شئ عجيب بنستقوى على ايه انا مش عارفه

بالمره وشئ مالهوش علاقه باى حاجه

افتكر زمان واعتقد لغايه دلوقتى مستشفى السرطان فى الزقازيق كانت بتطلب من اهالى المرضى يجبلهم بيرسول _ مبيد حشرى سام للانسان والحيوان _ علشان يرشوا العنابر علشان الدبان وحدث ولا حرج << احساسى انهم كانوا بيعتبروه معطر جوا

ليه يا مصر كده ؟؟!!

2009-06-08T20:55:00.002+03:00

السلام عليكم

من كام يوم كده قريت وسمعت خبر ترحيل عمرو خالد من مصر لمده سنتين او تلاته

المهم بغض النظر عن شخصيه الاستاذ عمرو وان كنت انا بحب اسلوبه وطريقه تفكيره العمليه

الا ان كلامى بعيد عن اى محابه ليه

الى عرفته وده اتنشر فى جريده المصرى يوم

انه اترحل علشان بيعمل برنامج جديد اسمه المجددون وده علشان تخريج دعاه جدد وكمان علشان كان هو متبنى قرى فقيره جدا وكان عايز يصلحها

واستكمالا لبرنامج قصص القرأن والى كان هيبقى فيه قصه سيدنا موسى مع فرعون وكان هيفتح باب النقاش فى منتداه على القصه وربطها بالواقع

والامن اعترض على ده معرفش ليه واعترض على كل حاجه ومنعه من استكمال اى حاجه ومنعه حتى يصور برامجه او يطلع فى اى قناه فضائيه مصريه ؟؟ّّّ!!!

صراحه معرفش ليه كده يعنى هو بيسعى لخير ليه بنوقفه ؟؟

ولا هو احنا بنبعد الناس الى بتحاول تساعد مصر وبنسيب الناس الى بتساعد فى خرابها

ثم لو هو فيه شئ غلط او بيعمل حاجه غلط ليه الامن مش بيعلن ده ويقول احنا رحلناه علشان كذا كذا كذا

شئ عجيب وغير منطقى بالمره

عموما الاستاذ عمرو نموذج للناس الى بتحاول فعلا تساعد مصر ولعل سفره خارج مصر يكون افضل بكتير من تواجده فيها

ويحقق نتايج وصدى اكبر بكتيييييييييير مما كان هيحققه لو كان فى مصر

ويارب ده فعلا يحصل ويكيد العوازل فى مصر واذا كانوا بيحاولوا بيعدوا الناس الكويسه بغرض انهم يحدوا من انجازتهم ربنا يجعل غربتهم افضل بكتير

يوم لمدينه المنصوره < توبه >

2009-05-29T10:52:00.002+03:00

يوم الى مدينه المنصوره

ويارتنى ما روحت بس الحمد لله

امبارح كنت فى رحله مكوكيه للمنصوره اشترى حاجات

المهم ايه بقى بغض النظر عن القطر الدرجه التانيه مميزه الى هى تقريبا درجه تالته تحت العاديه وعن مواعيده الى مش مميزه خالص يعنى القطر مشى بعد معاده يجى بنص ساعه ولا عن قطر الرجوع الى برده زيه زى قطر الصبح ولا عن المحطات الى مش فيها لوحات ارشاديه تعرفك فين رايح ومنين جاى لفين وكانك فى متاهه ابدا ابدا انا مش هتكلم عن كل ده دلوقتى

ممكن فى اخر البوست

المهم بقى انا استفدت من اليوم ده كام حاجه كده

اولا

انت لما تبقى ناوى تعمل شئ لله وترجع فيه جهز نفسك لعدم التوفيق

ازاى فرضا يعنى فرضا مثلا صاحب موقع اغانى ونوى انه يقفله ويقلبه قرأن وبعد فتره قال لا انا هرجعه اغانى تانى او اغانى محترمه

يجهز نفسه انه مش هيصادفه التوفيق ولا حتى التيسر فى الامور

وقيس على كده حاجات كتيره جداااا

ثانيا

البلد دى احسن من غيرها

اه بجد والله, يعنى ما تسافرش بلد تانيه تقول اصل الحاجه فيها ارخص او احلى او مميزه , ليه بقى اقلك انا بلدك انت عارف كل حته فيها

عارف فين المناطق الحلوه والوحشه عارف مين اسعاره احلى عارف هتروح فين بالظبط وفين افضل مكان علشان تشترى منه انما البلد الغريبه انت بتنزل تهيم على وجهك فيها مش عارف نظام البلد مش عارف فيها فين افضل المحلات او مين الى ممكن يضحك عليك ومين الى هيبقى هوين عليك فى السعر, كمان لازم تحط فى اعتبارك المصاريف الى هتتصرف فى السفريه مواصلات واكل وشرب اذا ماكنتش المصاريف الى هتتصرف فى السفريه + الحاجات الى هتشتريها ارخص من بلدك يبقى ما تسافرش لانك هتكون معملتش حاجه

انت بس ممكن تسافر فى حالتين

لو هيبقى معاك واحد من اهل البلد يعرفك الاماكن ويوديك الاماكن الى تعرف تشترى منها

ولو المصاريف الى هتصرفها فى السفر هتكون اقل وارخص من لو اشتريت من بلدك

غير كده شايفه انها عمليه غير مجديه

ثالثا

فى مره كنت اتكلمت مع صديق عزيز واتكلمنا عن سفر المرأه وكده المهم بينى وبينكم هو اقنعنى انه حرام ان الست تسافر بدون محرم

بس بينى وبينكم برده قلت ايه يلا معلش بقى او يعنى عادى قوم ايه بقى انا كنت قلتله خلاص يعنى هحاول انى ماسفرش تانى لوحدى

ويشاء الله ان اكتر من سفريه بعدها تكون مثلا هسافرها لوحدى ما تحصلش , وبعدين جت سفريه المنصوره دى !!!

فى الاول السفريه كانت عاديه من حيث اننا لحقنا معاد القطر وكده وانى استمتعت فى بدايه اليوم الا ان نهايه اليوم ماكنتش عاطفيه خالص

اولا ما عملتش اى حاجه من الى كنت مسافره ليها

ثانيا فى الرجوع بقى حدث ولا حرج لما وصلت المحطه الى المفروض انزل فيها مالقتش رصيف فا مشيت لاول القطر علشان الاقى رصيف قوم ايه بقى عقبال ما اتمشيت شويه كان القطر مشى تانى !!

واضطريت انى انزل فى المحطه التانيه وانزل اركب مواصله تاااانى علشان ارجع بلدى

ساعتها بس قلت توووووبه ان كنت اسافر تانى لوحدى او بدون محرم

************

على الرغم من ان السفريه فى مجملها مش كانت كويسه او مش موفقه بس

يكفينى انى استخلصت الكام حاجه الى فوق واتعلمتهم علشان ما اكررهمش تانى

وكمان دخلت صليت فى جامع ودى كانت اول مره اعملها انى اكون خارجه وادخل اصلى الفرض والصراحه هى كانت امنيه والحمد لله اتحققت

كمان استمتعت جداااا بمنظر الاراضى الزراعيه وانا ماشيه بالقطر وجه فى بالى

ان مصر جنه الله فى الارض بس لولا الناس الى مبوظنيها والى ربنا يهديهم او يستبدلهم بالافضل الى يصلحوا حال مصر

حاجه كمان اخيره الناس الكويسه لسه كتييير والحمد لله وان كانوا مش ظاهرين وده لسوء النوعيات الوحشه والى هى ظاهره قوووى

ليه بقول كده لما فاتنى النزول فى المحطه قعدت جمب اتنين رجاله كبار صعايده وحقيقى شهامه ورجوله الصعايده عرضوا عليا فلوس علشان اركب اروح لبلدى وكمان كانوا متابعين اى محطه اقرب انزل فيها وكل ما القطر يهدى شويه يشفوا اذا كانت محطه هيقف فيها ولا لا علشان انزل بجد ربنا يكرمهم

ووووبس كده ولغايه هنا اعتقد خلاص معنتش هعمل رحلات مكوكيه لاى مكان تانى لوحدى او بدون محرم

ودعواتكم بقى لمصر ولشباب مصر النهارده الجمعه ويوم مفترج

**********

شكر خاص لصحبتى و انتيمتى الى انا مدوخاها معايا فى كل حته

ربنا يكرمها يارب ويوفقها فى حياتها ان شاء الله

يوم فى مدينه السويس

2009-05-21T09:45:00.004+03:00

كوبايه شاى مع سيجارتين ........

لالالا فطار وكوبايه شاى بلبن مع مدونتين وبالمره اشوف الرسايل <<< مهمه بقى تعملوا ايه

المهم من كام يوم روحت السويس

وصراحه مدينه جميله ونظيفه يعنى حسيت ان تخطيطها حلو والتشجير فيها برده لذيذ بس الغريب الى فيها هو الغربان فيها كميه غربان كتيييييييييييره جداا

المهم انا فى اليوم ده جت على بالى كام خاطره كده وهما ايه بقى

واحنا ماشيين فى الطريق كان فى جبال وصحرا ومناطق واااااااسعه ومقطروات كبيييييييييره بتعدى

جه فى بالى بقى الايه القرأنيه الى بتقول

>> لمن الملك اليوم لله الواحد القهار <<

حقيقى الايه دى على قد ما هى بسيطه ومنطقيه الا ان فيها كميه رهبه كبيره جداااااااااا وتحس فيها بعظمه ربنا وقوته وجلاله

اصل ايه بقى انا جه فى بالى واحنا ماشين بالبيجو فرضا انا بقيت املك الارض دى كلها بكل الى فيها وديان واراضى حسيت انها هتبقى مسؤليه كبيره وجه فى بالى فرعون وهو بيدعى انه الاله, وجه فى بالى أن فرضا لو انا بقيت لوحدى على الارض ماكنش هيبقى ليها معنى وساعتها حسيت بالايه دى ولمن الملك اليوم ؟؟؟ حسيت روحى بتقول لله الواحد القهار اصل ماينفعش انها تكون لحد تانى غير ربنا تدبير الكون بنظام وتدبير احوال البشر وتدبير كل حااااااااااااااااجه استحاله يقدر عليها غير الواحد القهار > سبحانك يارب بنشوف عظمتك فى كل حال من احوالنا بس احنا الى نسينا التدبير واتعودنا على الاليه وان كل حاجه حواليا ده العادى مع ان احنا لو تفكرنا شويه هنلاقى ان مافيش حاجه اسمها عادى فى حياتنا كل حاجه بتحصل حتى لو كان جرح فى ايدك فاده ممكن يكون لحكمه تخريج دم فاسد او او او وان لولا الجرح لكنت ممكن تمرض بأختصار خلونا نصفى روحنا شويه ونستمتع احيانا بالتأمل فى خلق الله علشان روحنا تصفى ونعرف قد ايه عظمة ربنا .

*************************

فى اليوم ده روحت عند سيده فاضله بحق من اهل السويس جوزها مات فى حرب 73 بجد ست تحسسك أن هى دى الست المصريه

بجد والله

ست ربيت عيالها كويس جداااااااا عندها فكر عالى جدااااااااااا فى تربيه عيالها وبطرق تربوبيه يمكن الى واخدين درجات عاليه فى التعليم ما تخطرش على بالهم

من ضمن المواقف الى سمعتها منها

وهى بتحكى لما جوزها مات وبقت هى المسؤوله عن مصروف البيت كانت بتجمع عيالها حواليها وتقلهم احسبوا انتم احنا محتاجين ايه وهيفضل كام وكده علشان تعلمهم المسؤليه وتخليهم يشاركوها فى كل حاجه

والله يا جماعه مكان الست الطبيعى فى البيت مش فى الشغل ولا التعليم العالى احسن علماء طلعوا من بلدنا كانوا من امهات ربات بيوت واميين بس ستات عندها فكر راقى عندها وعى بعيالها

حاليا مش هنقدر نرجع تانى الستات للبيوت بس لازم يتحط مواد دراسيه لتعليم الفتيات والذكور معا يعنى ايه اسره وتربيه اطفال وتحمل مسؤليه علشان الاجيال الى طالعه مش تطلع ضااااااايعه.

********************

الست الفاضله دى اتكلمت عن جوزها صراحه هالنى كلامها

ليه ؟

اقلكم

بتتكلم عليه بكل حب مع انها يمكن معشتش كتير معاه بس بتتكلم عليه وكانها عاشت معاه 100 سنه بتفتكرله كل مواقفه الحلوووه

فكرتنى برده بإن مابيفضلش بعد موت الانسان غير سيرته الحلوه وخاصه لو كان زوج او زوجه

يسلااااااااااام لما زوج او زوجه يكونوا كويسين مع بعض وربنا يقبض روح واحد منهم حلو قوووى ان التانى يفتكرله الحلو مش الوحش ومايقلش بلا هم كانت عامله ازعاج او بركه ريح واستريح

الكلام ده علشان الازواج الى بيتفننوا فى انهم يحرقوا دم بعض اتقوا الله فى بعض علشان لما تمشى الاخر يفتكرلك الحلو مش الوحش

ماهو اصله مابيفضلش غير السيره الحلوه والمواقف الجميله.

**********************

كل موقف او خاطره من الى فاتوا يستحقلهم موضوع لوحده لانهم اكبر من مجرد خواطر .

القاكم فى خاطره جديده

>>> وش برئ بيدل على الهدوء النفسى علشان بس لسه على الصبح.

إن كيدهن عظيم

2009-05-08T21:52:00.003+03:00

مساء الخير على اخونا الرجاله الغلبانين

المهم افتكرت حاجه جت فى بالى

وهى ايه دهاء المرأه

اه لؤمها يعنى

كتير من الرجاله بينخدع فى دهاء الست مش عارفه ليه

سيبك من ان الست ممكن تكون طيبه او شريره او مثقفه او أميه

انما اى نوع من انواع الستات تلاقى عندها كميه دهاء رهيبه

يعنى اغبى ست فى رائ ممكن تخدع اذكى راجل

الى بيخلنى اقول كده ليه؟؟

مواقف كتير اتحطيت فيها الاقى الى قدامى بيستقل بمخى اكمنى يعنى مش من هواه الخروج ولا ليا فى الكلام الفاضى الاقيه يستقل بمخى ويقول بس انا هقدر اضحك عليها وفى الحقيقه انا الى بستعبط بمزاجى نياهاهاهاه ......

على فكره انا فى رائ ان الدهاء واللؤم صفه بتتولد مع المرأه يعنى نقدر نقول وراثيه ممكن تبقى شديده وممكن تبقى خفيفه بس الاكيد انها عند كل الستات فى اى مكان على وجه الارض .

فى ايه فى القران بتقول > إن كيدهن عظيم

وده بيقابل برده لؤم المرأه

يعنى الستات مثلا الى بينضحك عليهم فى اى حاجه سواء علاقات عاطفيه او تجاريه او اى كانت ساعتها بيظهر عندها الدهاء وحب الانتقام بس بطريقه مبتكره مش زى الرجاله طرق تقليديه فى الانتقام

لو بصيت على اغلب جرائم القتل المشهوره هتلاقي الستات فيها بينتقموا بطرق جديده جداااااااا

الكيس والساطور _ تدويب الانسان فى بوتاس ومن ثم فى المجارى _ الدفن تحت الارض > ريا وسكينه

شئ عجيب وغريب عندنا قدره رهيبه على الاخذ بالثأر والتفكير فيها بشكل جديد اعتقد ربنا عوضنا بالدهاء بديلا عن القوه الجسمنيه الى بيتميز بيها الرجال وإن كان الرجال قوتهم بتضعف مع تقدم السن فإن قدره دهاء المرأه اعتقد فى رائ بتزيد بتقدم العمر لزياده الخبرات الحياتيه فا بيزيد معها الدهاء.

حاجه اخيره ودعوه صادقه

ياريت يارجاله ما تستقلوش بلؤم الستات ابدااا وما تأمنوش مكرهم ودهائهم

واوعوا تفتكروا ان اى ست ممكن يعدى قدامها حدث او موقف او حتى كلمه من غير ما تفسروا >>> بالذات لو مع الرجاله الست مخها واحاسيسها ومشاعرها وحواسها بتنتبه فى تعاملها مع اى رجال وتلاقيى مخها بيشتغل دينمو ساعتها وممكن تفهم الطايره زى ما بيقولوا على عكس لو بتتكلم مع ست زيها

حاجه اخيره بجد الزوج الى ممكن يكون فاكر انه بيخدع زوجته بيبقى واهم بجد

بس كده ومش عندى حاجه تانيه

يمكن بكره ولا بعده اكتب تانى

حاسه انى ليا رغبه انى اكتب بس عن ايه الله اعلم

كل شئ هيبقى حلو ان شاء الله وهيمشى حسب الخطه

2009-05-05T20:30:00.004+03:00

السلام عليكم

لقيت وقت فاضى قلت ادخل اشوف المدونه والف على المدونات الشقيقه وبالمره اخد رائيكم فى حاجه <<< استغلال

احمم المهم

مش عارفه ابدء منين ولا منين

كان فى كم حاجه كنت عايزه اقلهم

اولها

من فتره قريبه قريت كتاب اسمه ذا سيكريت المهم الكتاب ده فكرته كلها عباره عن انك زى ما هتتخيل حياتك هتمشى بمعنى اذا تخيلتها حلوه وانك مثلا بقيت من افضل الاطباء فى العالم هتعمل ده فعلا واذا تخيلت ان حياتك هتفضل فاشله وان حظك الوحش هيفضل ملازمك هيحصل ده فعلا ليك

لان الكتاب بيقول ايه ان الطاقه الايجابيه بتاعه التفكير هى الى بتخلينا نتحرك ناحيه الايجايبه وفى الطريق الى هيحقق لينا الى بنتمناه

والعكس بالعكس __ انا شفت الفيلم مترجم والصراحه الى كان مترجمه كان حاطط تعليقات ايمانيه رائعه وده لسبب

ان كل الى هما اتكلمو فيا بيدور حوالين العقيده السلاميه او جوهرها بمعنى اصح يعنى ( الدعاء - التفاؤل - حسن الظن بالله - العمل والاجتهاد والنتيجه على الله ") كل دى حاجات اتكلموا فيها بس طبعا مش بشكل دينى لا من وجه نظر ناس غربين عمليين

اعتقد فى رائ المتواضع ان الناس دى لو عرفت الدين الاسلامى صح هتعرف انه الدين الخاتم المناسب لكل العصور واعتقد برده ان الدين الاسلامى لو اتشرح برا فى البلاد الاروبيه بشكل واضح ومناسب ليهم هنلاقى اعداد غفيره دخلت فيه

عموما انا بستعجب على الناس الى بتقول الدين ماينفعش نمشى بيه الساسيه او الدوله والحكم

واخيرا انصحكم فعلا تدورا على الكتاب وتقروه وترجموها على الصوره الاسلاميه

على فكره الفيلم والكتاب من حوالى سنه بس انا لسه قرايهم قريب واقلت اقلكم عليه

الشئ التانى بقى

كنت طالبه منكم استفتاء صغير

وهو عن منتدى لانى ناويه ان شاء الله اعمل واحد وكنت عايزه اعرف كام نقطه وياريت مش عايزن الناس البخله بالافكار والنصايح يعنى عايزين نشوف ما تجود به قرائحكم

المهم

1/ ايه اكتر حاجه ممكن تشدك لمنتدى ؟

2/ ايه اكتر حاجه ممكن تخليك تستمر فيه وتابعه؟

3/ايه اكتر حاجه ممكن تخليك تبقى نشيط فيه يعنى ترد على مواضيع وتكتب مواضيع ؟

4/ايه اكتر حاجه تخنقك من المنتدى ؟

5/ ايه اكتر قسم بتفضله فى اى منتدى ؟

بس كده

وشكرا على حسن متابعتكم .

ضد التغير, ضد التجديد, ضد الميه, ضد الحشره, ضد الفار.

2009-02-23T07:40:00.004+02:00

صباح سعيد, صباح شريف, صباح جميل, وكل الصفات الحلووووووووه

المهم انا طبعا بقالى فتره كبيره مش دخلت المدونة فقلت فرصة وانا بفطر اشوفها والحق اطلع على اى مدونة تانية, المهم دخلت مدونة الاخ مراكبى ولقيتة بيتكلم عن ان كوريا متقدمة عن مصر مع انها بدات بعدنا, العجيب بقى انى مش بتكلم عن البوست انا هتكلم عن ردود الناس, كل الناس او اغلبهم بتقول احنا مش هنتغير او التغير هيكون بعييييييييييييييييد, ودة شئ غلط لان الى بيقول كده اكيد ماقراش تاريخ او مش عارف سنة الكون, لان الدنيا اصلا طبعها التغير والتجديد, ومافيش حاجة بتفضل على حالها ابدا يعنى شئ مستحيل اى بلد هتفضل متقدمه على طول او متاخره على طول, يعنى حتى مصر القديمه حضارة سبع الاف سنه جت عليها فترات ركود, فا مش ينفع نقول احنا مش هنتغير الا بقى اذا كل واحد مسك نفسه واقلها والله مانتى متغيره...

ياااااااا جماعه هرجع اقول وازيد ان مافيش اى بلد بتتغير الناس الى عايشه فيها هى الى بتتغير, احنا الى لازم نتغير, احنا الى لازم كل واحد يبدء بنفسه....

كنت بتكلم مع انسان فاضل سعودى فى عمل المهم هو انسان متفتح جداااااااااا ومن ضمن حديثى معاه لقيتة بيقلى والفلوس المرسله ليكى هى بالدولار بس انتى هتستلميها بالمصرى وانا ارسلتها دولار علشان سعر الصرف اعلى وكمان الاسم انك دخلتى عملة صعبة للبلد وافدتى اقتصاد بلدك !!!!!!!!!!

صراحة انا عمر ماكان يجى فى بالى التفكير دة باختصار شايفين الناس بتفكر ازاى يعنى ابسط شئ انا دخلت عمله صعبه للبلد اى نعم فى ناس ممكن تقلى دول الناس الكبار هى الى بتستفيد هقله اعمل الى عليك وعلى ربك النتايج, اقول اية تانى اه فى ناس بتقول ان الناس مش فاضية لا بقى الناس فاضية اه ه ه فاضيه يعنى الشباب العاطل ده كله اهو قاعد فاضى اية المشكله انه يروح يتعلم صنعه ويفتح مشروع ايه المشكله انه يروح يتطوع فى الجمعيات الخيريه هتقولوا وهى دى اخرتها بعد الشهادات هقول لا مش اخرتها دى بدايتها الانسان لازم يحاول ويجرب ويتعلم ويشوف ولا الافضل انه يقعد يلف فى الشوارع لغايه ما الوظيفه تيجى تخبط على بابه وتقله انا الوظيفة المناسبه لشهادتك تعالى يلا اشتغل!!!!

الناس الى فى البيوت الناس الكبيرة ماهو برده مش معقوله هى قاعده 24 ساعه بتفكر فى المعيشه استحاله يعنى بلا خلينى معاكم انهم ليل نهار بيفكروا فى المعيشه خلاص مش قادرين وهما بيصلوا يدعوا لمصر ولشبابها !!! ولا كمان بيفكروا فى المعيشه وهما بيصلوا !!؟

على فكره حاجه اخيره وبسيطه بتوع شرق اسيا جلوسهم على النت مختلف تماما عنا

جلوسهم ياما شغل او تطوير حاجه او تعليم او برمجه وقليل جدااا ترفيه, على العكس منا طبعا كتير جدااااااااا ترفيه ونصب >> على فكره انا شفت مصريين نصابين على النت وللاسف بيبقوا مخهم نضيف جداا بس بيستخدومه غلط << وقليل قوى الى بيقعد شغل او تطوير او تعليم, وده الفرق بينا وبين اى دوله متقدمه هما بيقدروا الوقت واحنا بنهدره.

-----------------------------------------------------

الحمد لله يارب بدات فى تحقيق احلامى او نقدر نقول عليها امنيات او طلبات كانت صعبة شويه بس الحمد لله واحده تلو الاخرى بدأت تتحقق دعواتكم انى اكمل كل الى بتمناه ومش اكسل عنه.

********

على فكرة يا جماعه محدش ملاحظ ان بجد الايام بتجرى بسرعة البرق !!!!! بجد الواحد مش مصدق ان احنا خلاص عدينا شهرين من بداية السنه الجديده.

********

محدش مكان ملاحظ ان الشهر دة _فبراير _ شهر كبيس وطووووووووووووويل وفيه ازمات ماليه اصل كل الى حواليا بيتشكى منه ولا يمكن دى اكزيما منتشره عندنا بس فى الزقازيق.!

من زمااااااااااااااااااااااااان

2009-01-14T16:44:00.002+02:00

يااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااة

من زماااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااان

الواحد مش جة هنا بجد حاسس انة داخل شارع جديد او بيت جديد

لا بجد حاسة بغربة خفيفة فى المدونة بعد ما كنت بشيك عليها كل ثانية بالريفرش واشوف فى حاجة جديدة حصلت هههههههههههه بقيت مش لاقية وقت افتحها حتى اشوف شكلها

يلا فعلا الدنيا تلاهى

المهم كل سنة والجميع بخير ويارب تكون سنة حلوة على الجميع

طبعا مش هتكلم عن اى مووضوع لانى الصراحة دماغى مش فيا الايام دى بس

عموما انا حاسة انها هتبقى سنة حلوة بالنسبالى ان شاء الله وحاسة انى هنجز فيها حاجات كتير مهمة

واتمنى بجد انى احققها لانى فاكرة السنة الى فاتت بردة قعدت فى اولها وقلت هعمل واسوى وكانى ومانى ودكان الزلابنى

ولا حاجة من دى حصلت خالص ولا حتى ربعها

بل اعتبرها كانت سنة كبيسة شوية اى نعم اتعلمت فيها شوية حاجات وخدت معلومات واتعرفت على ناس بعتز بيها

بس الحمد لله

اتمنى انى السنة دى احقق الى بتمناة ومش اكسل لانى كسولة مووووووووووووووووت ومن محبى فكرة التاجيل لاى حاجة حتى لو هقوم اشرب بق مية باجلة كمان شوية علشان مش عارف اية ممكن يحصل اية ... صفة وحشة مووووت

مع علينا كفاية نم عليا كدة الواحد مش ناقص ذنوبة تكتر عن كدة

المهم انا بجد وحشتنى المدونة ووحشتنى مدونات الناس الى كنت بدخلهم । بس ربنا ييسر ان شا ءالله والامور تتظبط كلها

2008-11-18T15:22:00.002+02:00

السلام على اهل السلام

بقالى فترة بفكر فى حاجة تكتب ومش لاقية وبقيت اقول لنفسى اية الافكار معقولة خلصت !!!!

المهم لقيت حاجة وهى الاعلان المصرى الى بيقول مش عارفة اية وفرت فى دواها وبدل ما تشترى علبة وترمى الباقى وفرت وجابت شريط وبالباقى اشترت كتاب لابنها

انا عكس الناس الى شايفة انة وحش لان فعلا لو دورنا فى حياتنا هنلاقى ان احنا ناس مسرفين فعلا .............

بلاش المدخل دة هغيرة

هل يا ترى احنا بنعمل الى عليا تجاة الاشياء الى حوالينا ؟؟؟؟

بمعنى تانى ,

هل كل واحد فينا بيحافظ على المية لما بيجى يستخدمها ؟؟ ولا بيستخدمها ولا كأنها ببلاش ومش هيتسأل عنها يوم القيامة ؟؟ بلاش انها حرام وان الانسان هيتحاسب على كدة ॥؟؟ على الاقل نعمل الى علينا كلنا عارفين ان الموارد بتنضب , طب مش نحافظ عليها ,على الاقل نبقى قدام نفسنا عملنا الى علينا , وكمان وفرنا فى المية الزيادة والى هى طبعا فلوس زيادة ॥

بلاش المية

الشارع هل احنا عملنا الى علينا تجاة الشارع دة ؟؟؟

اغلبنا بيمشى يرمى فى الشارع , مع انة هيحاسب على كدة , بس ولا بيبقى فى بالنا !!!!!

بلاش المية وبلاش الشارع

خلونا فى الكهربا كتيييييييييييييييير قوى اسمعهم يقلوا احنا بنفتح الكمبيوتر والدش فى وقت واحد ونشتغل على الاتنين ؟؟؟!!!!!!!!!!!!!!!!

شئ مستفز ما هو يادة يا دة ولا دى مش كهربا وكل ما بنزود فى استخدمها بشكل عجيبهتزيد علينا الفواتير , مش كل دة استنزاف موارد سواء مادية للشخص او موارد للبيئة فى المجتمع ؟؟

بلاش المية والشارع والكهربا

خلونا بقى فى الاكل بجد بجد احنا ناس مسرفة جداااااااااااا بيبقى عندنا الاكل ونرمية مع انة سليم ونتأمر علية مع ان ربنا هيحاسبنا على كدة

سيبك من انة حرام هو مش الاكل الزيادة دة الى بيترمى بكثرة مش استنزاف للموارد المادية للشخص والبيئية للمجتمع , ولا اية

اعتقد انى ما بتكلمش غلط , وفى حاجات كتيييييييييييييييييييييييير احنا فعلا محتاجين نتعلم ازاى نتعامل معها , احنا اتعلمنا الاسراف وان ابو بلاش كتر منة و ان كل واحد يدور على حقة من غير ما يبقى عايز يعرف اية الى علية ।

انا شايفة ان الانسان لما بيحافظ على موارد المجتمع دة واجب علية مش رفاهية كلنا بندور على اننا عايزين نجيب ونجيب ونجيب واحنا ما بنحفظش على الحاجة الى بنجبها كثرة استعمال على الفاضى والمليان وكأن دة ملوش اى اثر , البلاد المتقدمة ما اتقدمتش الا لما عرفت ازاى توفر فى مواردها وازاى تستغلها الاستغلال الصح

عمرنا ما هنتقدم طول ماحنا عايزين ناخد الى لينا وما نعملش الى علينا , طول ماحنا فاكرين ان التوفير فى الموارد بخل وعيب ।

********************************************************

وعلى فكرة بخصوص الاعلان اى نعم هو فية شوية حاجات غير منطقية وان الواحد لو فضل عمرة يوفر فيها مش هيقدر يوفر لدرجة يجيب شالية فى بورتو مارينا

بس عجبتنى فعلا فكرتة او فكرة التوعية بمعنى اصح ..

تجليات

2008-11-04T18:21:00.003+02:00

حاجة غريبة جدا بنفرضها على نفسنا وعلى عقولنا وهى ان احنا ما نفكرش وناخد الحاجة كما قيلت وخلاص ونمنع نفسنا ونزجرها لمجرد انها تقول حتى طب لية كدة ومش كدة ؟؟

بمجرد حتى ان يجى فى بالنا السؤال على طول نطردة من دماغنا وكاننا اجرمنا

طبعا محدش فاهم انا بتكلم عن اية

بصوا انا اصلى لاحظت الموضوع دة من فترة كدة وهو اية بقى علشان مارغيش كتير

ان احنا ممنوع منعا باتا التفكير فى الامور الدينية او حتى ان احنا نجتهد ونفسر وسايبين الحكاية دى للعلماء على فرض ان هما ادرى وان احنا مش هنقدر نعمل زيهم ودى حقيقة فعلا بس مش معقولة نلغى دماغنا خالص

مثلا والواحد بيقرى القران احيانا بتعدى على الواحد ايات ممكن يكون قراها كتير بس يحس انها اول مرة وتستوقفة فيها حاجة معينة حاسس مثلا انها غلط او مش مظبوطة _ والعياذ بالله طبعا _ بس انا بتكلم عن حاجة بتحصل انا مثلا احيانا بتقف قدامى ايات اقول بس كدة المعنى مش راكب او مش المفروض تكون كدة !!!! وبلاقى نفسى اتوماتيك لا اكيد انا الى مش فاهمة وهى صح كدة

بس الغريب بقى ان الواحد مش بيحاول يفهم وبيسيب نفسة كدة على عماة مش فاهم لية هى كدة ولية مش زى مانا بقول فرضا يعنى

حاجة كمان فى احداث بلاقيها وبلاقى الضد بتاعها تخلى الواحد يقف عاجز مش عارف يفكر ويبدء ايمانة يتحرك بس للاسف اغلبنا بيوقف نفسة عن التفكير علشان ما يحركش ايمانة وبيخاف علية انة يقل او حاجة من التساؤلات دى مع انة لو شغل مخة شوية وحاول يفهم هيقتنع اكتر وايمانة هيزيد مش هيقل لان دينا هو الحق والحمد لله

المهم طبعا احنا عارفين ان المنجمين والسحرا كذابين وان اغلب شغلهم حلق حوش وحركات نص كوم بس يا اخى تلاقى ساعات حاجات من الى بيقلوها فعلا صح !!!!!!!!!!! وحاجات من الى بينجموها بتحصل بالظبط !!!!!!!!!!१ طب دة اية ؟ وهل هما فعلا صادقين ولا زى ما رسولنا علية السلام قال ؟؟؟؟

قعدت افكر قلت الاتنين صح وتعالى رسول الله عليهم طبعا بس اقصد حاجة ,ودة كان تفسيرى للموضوع ان السحرا دول ما ينفعش نقول عليهم كذابين فى المطلق والا هنكون بنخالف الواقع ومانقدرش نقول عليهم صدقين فى المطلق والا هنكون بنخالف كلام ربنا والرسول

طب اية الحسبة الى تقنع وتخلينى مقتنع اقلك , الرسول قال فيما معناه ان الشياطين بتسترق السمع من السماء وبتاخد معلومات من السماء من الى هيحصل مثلا لفلان او علان او للبلد دى وبتبلغ بيها اتباعها من السحرا ,تمام لحد كدة تمام ,كدة عرفنا السحرا بتعرف منين الاخبار بالظبط وصحيحة مليون فى المية । طيب هيطلع سؤال تانى طب لية ربنا بيسبهم يسترقوا هل والعياذ بالله ربنا مش هيقدر يمنعهم مثلا لا طبعا । امال اية الموضوع __ توصلت لتفسير دة بنفسى والله اعلم اذا كان صحيح ____ ربنا فعلا بيسبهم يسترقوا السمع ولكن بمشيئتة ।طب لية بردو ؟؟؟ اقلك لية علشان يختبر فعلا الناس هل هتصدق السحرا دول ولا هتصدق الرسول القران بمعنى اوضح ان ربنا عامل الموضوع زى الفتنة كدة علشان يختبر بية الناس المؤمنة بجد والى مش هتفتن لما تشوف ساحر بيقلها هيحصل كذا وكذا فى وقت كذا فى معاد كذا ويحصل فعلا وهى عارفة ومؤمنة كويس قوى انهم كذابين ومن هنا يحصل عملية تنقية للمؤمنين ।

فى حاجات كتييييييييييييير الواحد بيقراها سواء فى القران او فى الاحاديث وبنحس اننا عايزين نسال ؟؟ بس بنوقف مخنا عن التفكير مع ان ربنا خلق لينا العقل علشان نفكر وعلشان نتدبر فى الكون وفى القران والاحاديث وفى الحياة عموما , ما ينفعش ان احنا نلغى عقلنا ونسيب غيرنا يفكر لينا انا مش بقول ان احنا كلنا لازم نبقى علماء لا طبعا بس على الاقل الحاجة الى نحس ان عقلنا رافض يقتنع بيها او حاسس انة محتاج يفسرها يدور على تفسيرها يسال, يدور, يحاول هو بنفسة يفسر ويشوف اذا كان تفسيرة صح ولا غلط انما نلغى عقلنا خالص كدة , كمان نشغل مخنا علشان لو حد جة وقلنا حجة فى القران او السنة نكون عارفين تفسيرها نعرف نرد علية

مش نتحول معاه ونسال معاة مثلا هو لية ربنا هيدخل ناس النار على طول ومش هتطلع مع ان من صفاتة انة رحيم ؟؟؟ وبدل ما نرد عليهم ونقنعهم بالسبب نقوم راحين معاهم ونسال زيهم ومش بعيد ان فى ناس بتسيب الدين علشان مش بيلاقوا اجابات على اسئلتهم مع انهم لو دورا بجد وحاولوا بنية خالصة هيوصلوا للتفسير الصح ॥

انا رغيت كتير قوى بس بجد انا لقيت لما الانسان بيبقى عايز يفسر او يتدبر فى أية او حديث او اى حاجة بتحصل وحاسس انها متعارضة مع الدين وبيفكر وبتكون نيتة انة عايز يوصل للحقيقة بس والتفسير الصحيح ومسلم لله ربنا بيفتح علية وبيلهمة التفسير وانة يفتح مخة للتدبر.

**************************

انا بستغفر الله لو فى اى حاجة فى كتاباتى غلط او اتقالت وانا مش واخدة بالى بشكل لا يليق بالله فانا بستغفرة واتوب الية واذا حد لاحظ دة ياريت ينبهنى وانا هعدلة على طول ।

حاجة كمان ياريت التدبر والتفكر ما يكونش مقتصر على الدين بل بالعكس ياريت يمتد لحياتنا اليومية ووووووو مش هفسر عن كدة وكل واحد بقى يفكر براحتة

تصدير واستيراد جثث

2008-10-26T21:46:00.003+02:00

ال ايييييييييييييييييييييية ليبيا عايزة تستورد جثث من مصر !!!!!!!!!!!!!!

من قلة جثثهم مثلا يعنى ولا اية ولا هى يعنى الجثث المصرية هى الى فيها حاجة يزادة ايد مثلا ولارجل علشان كدة عايزين يستوردوا جثث مصرية ؟؟

ال ايييييييييييييييييييييييية طلبة الطب الليبين عندهم نقص فى الجثث علشان كدة طالبين استيراد جثث من مصر علشان يعرفوا يزاكروا ويتعلموا !!!

اى نعم هو الطلب اترفض بس الرفض جة مش علشان عيب طلب زى دة ولا علشان يعنى اية نصدر جثث انما لا الرفض جة من ناحية ان اصلا مصر مش فيها فايض جثث علشان تصدر لغيرها !!!!!!!!!!!!!!!!!

يا نهار اسود ومنيل

بقى كل الحوادث الى بتحصل فى مصر دى كلها والحرق والغرق ووالانهيارات ومافيش فايض جثث!!!!!!!!!

اهو دة اكبر دليل للمشككين فى نزاهة الحكومة علشان يعرفوا بس ان الحكومة بتعمل لمصلحة طلبة الطب والعلم والعلماء عندنا لان ياعينى طلبة الطب عندنا مش لاقين جثث يشرحوها فا الحكومة مساعدة منها فى ذلك ولحل الازمة تبتتسب فى حدوث الكواراث ॥

الغريب لما كل الحوداث دى ومافيش فايض امال لو ماكنتش الحوداث دى موجودة كان الطلبة هتشرح اية يعنى ؟؟؟؟؟؟؟؟؟؟؟

بس بجد حاجة تفقع وحاجة تغيظ طلب استيراد جثث دة ؟؟؟

وعلى رائ معتز الدمرداش فى برنامجة لو مش لاقين جثث احنا كمان نستورد من الصين ّّّّّّّّ!!!!!!!!!! ماهى الصين بتورد كل حاجة وماجتش يعنى على الجثث ,,

العجيب بقى وانا بفكر فى الموضوع قولت لو كان فعلا حصل يبقى الراجل الميت دة يبقى عمرة ما خرج حتى من محافظتة اصلا ويوم ما يخرج ويسافر يسافر وهو ميت لا واية كمان علشان يتشرح

اييييييية يلا عزائة الوحيد انة بيخدم العلم والعلماء

انا من رائ بعد كدة ان كل واحد يكتب فى وصيتة انة لو هيتورد علشان كليات الطب يبقى يختار البلد الى يحب يتشرح فيها , اه طبعا ماهو اذا كان الواحد مش هيملك انة يختار فى حياتة البلد الى يموت فيها يبقى يختار البلد الى يتشرح فيها

وكما قيل قديما

الى اختشوا ماتوا صحيح

ال نورد جثث ال !!!!!

________________

بمناسبة الطب وطلبتها

مش عارفة لية كل ما ادخل مدونة الايام دى الاقى صاحبها ياما دكتور ياما طالب فى الطب مش عارفة لية عندى احساس انهم احتلوا التدوين المصرى !!

محدش عندة فكرة عن الموضوع دة ولا اية ؟؟؟؟؟؟؟؟؟؟

التزاااااااااااااااااااااااااام

2008-10-10T10:46:00.004+02:00

مين جرب يعيش حياتة من غير التزامات ؟؟؟؟؟؟؟؟؟؟؟؟؟؟؟؟؟؟؟؟؟

عموما للى جرب والى مجربش

انا جربت الصراحة مرة او مرات اعيش حياتى من غير التزمات , بمعنى انى معملش اى حاجة المفروض ان اعملها , بمعنى اوضح

تقدر تقول انى تركت الالتزمات ابتدء من غسيل الوش الصبح لغاية الفروض وقيس عليها حاجات كتير فى حياتنا المفروض نلتزم بيها مش بس علشان هى صح او علشان هى مفيدة او علشان دى فروض الزامية ,انما انا جربت انى اعيش الحياة الحيوانية _ ان صح التعبير لان معروف بردة ان الحيوان لية التزمات وبيلتزم بيها _ بس يمكن مش بشكل كبير بس جربت بدايتها مانكرش ان فى البداية كنت حاسة بفراغ لذيذ ان مش عليا اى التزام ناحية اى حاجة مافيش حاجة مفروض انى اعملها بس الحمد لله الاحساس دة مقعدش كتير اعتقد يوم والتانى وبدات احس بملل واكتئاب , وعدم وجود جدوى لاى حاجة بتتعمل وان الفراغ وعدم الالتزام اشد قسوة وافظع احساس من الالتزاام نفسة ...

خلينى اقرب المعنى للناس الى مش جربت النوع دة من التجارب كلنا فى الدراسة كنا بنتمى الاجازة امتى تيجى علشان نقعد براحتنا بدون اى التزام لا واجبات ولا مدرسين ولا خوف من نتيجة ولا اى حاجة بس بمجرد ما بناخد الاجازة اسبوع والتانى والتالت وهوووووب نلاقى نفسنا بنقول امتى تيجى الدراسة على الرغم اننا عارفين ان فيها التزام وواجبات وصحيان بدرى بس اشتقنا للالتزام اشتقنا للنزول الصبح وانى يكون معيا كراسة جديدة واكتب واحل فيها ..... اييييييييييية ايام

المهم حد فهم قصدى *********

بجد يا جماعة وبدون اى فلسفة

الالتزام هو قمة الحرية النفسية , وان قيود الالتزام مهما كانت كتيرة وتقيلة وصعبة فهى اهون مليون مرة من عدم الالتزام .

حقيقى بتحس انك عملت الى عليك وان ليك قيمة وفايدة مش خايف من عقاب حد انك مأدتيش الى عليك حتى لو مش خايف من حد يكفى انك حاسس انك بتعمل الى عليك انك مشغول فى حاجة مش مجرد بتاكل وتنام مش هقول زى الحيوانات لان حتى الحيوانات ليها التزامات بتأديها حتى وان كنا منعرفهاش بس هقول كأنك بلا وجود

______________

يعنى دى كانت تجربة عابرة فى حياتى حبيت اكتبها لمجرد ان غيرى يستفيداو حتى لو مش استفاد حد فانا كنت عايزة اكتبها غلاسة بقى حد لة عندى حاجة

تامر وشوقية وعصفور ونانسى وهلم جرااااااااااا

2008-10-01T12:31:00.002+02:00

كل سنة وانتم طيبين وربنا يتقبل منا جميعا الصيام والقيام ويكون عيد سعيد على مصر كلها

بدون اى مقدمات ولا اى حاجة

مسلسل تامر وشوقية بجد من المسلسلات الترفيهية الى فيها كمية ممثلين جداد بس حلوين جداااااااااااااااااااااااا

يعنى بغض النظر عن المسلسل فية شوية تجاوزات من حيث الالفاظ والايحاءات وان الجزء التالت بتاع السنة دى مش كوميدى زى الجزء التانى بتاع السنة الى فاتت _ ماشفتش الجزء الاول _

الا ان انا شايفة ان الجزء التالت دة فية شوية ممثلين تحفة بجد بجد يعنى عارفين يعنى اية تمثيل عارفين يقنعوك بالدور الى هما بيأدوة

منهم على سبيل المثال لا الحصر طبعا

عصفور الجرسون الى فى الكافية

نانسى وانا من اشد المعجبين بتمثيلها وعدم احراجها انها تأدى بعض الحركات التمثيلية الى البعض ممكن يحرج انة يأديها بجد ممثلة عندها طاقة تمثيلية جامدة جدا

الظابط فى القسم

قريبة شويقة مش فاكرة اسمها

بس بجد بجد فى ناس تمثيلها فية روعة وتحفة واعتقد ان دول المفروض يستثمروا نجاحهم وموهبتهم دى بشكل حقيقى وجاد

بس كدة انا بقالى فترة كبيرة يمكن من السنة الى فاتت وانا نفسى اتكلم عن تامر وشوقية بس ماكنش فى فرصة واهى جت

يلا كل سنة وانتم طيبين ومحدش يتقل فى الكحك والبسكوت علشان غلط على المعدة بعد الصيام وانا خايفة عليكم ابقوا ابعتهولى انا واناهتصرف فية

اعتقد محدش بيحبكم قدى اهو

خواطر شريرة

2008-09-25T21:00:00.003+02:00

السلام عليكم

اكيد يعنى انا مش مختلفة عن باقى الناس واكيد الى جوايا جوا كل الناس بس يمكن احنا الى مش بنشوف بعض من جوا

المهم حصل موقف كدة فى حياتى من فترة وجاتلى فكرة او خاطرة شريرة جدا

وهو ان عدم وجود بعض الاشخاص فى الحياة قد يكون افضل !!!!!!!!!!!!१

باختصار لو ناس معينة ماتت الحياة هتكون احلى ممكن ما تكونش احلى بكتير بس ممكن تكون افضل ।

الله اعلم هل فعلا لو توافهم الله هل الحياة هتمشى افضل هل هما فعلا سبب تعرقل بعض الامور !! مش عارفة يمكن دة نوع من انواع الانهزام انى مش لاقية اى حل غير انهم لو مش كانوا موجودين الحياة كانت هتبقى افضل !!!

اكيد فى ناس هتلومنى على احساسى دة واعتبارى شر يمشى على الارض , ولكن مين فينا ما تمناش موت اشخاص بعينهم كى تصبح الحياة افضل

>> ياريت محدش يقلى شارون واليهود انة بيتمنى موتهم لان دة شى طبيعيى وانا مش بتكلم على الاشخاص الى من النوع دة الى كراهيتهم تعتبر واجب وطنى ولكن انا بتكلم عن الشعور الشخصى تجاة اشخاص شخصييين

>>> وياريت كمان محدش يقلى ان من قتل نفس كانة قتل الامة

لانى مش بفكر فى القتل الصراحة خالص ولكن انا بفكر فى الحل الاسلم وهو انهم يموتوا موتة طبيعية

>>>>> اية الشر الى انا بكتبة دة , مع علينا انا انسانة بردة وفيا الحلو والوحش واكيد فيا نسبة شر بس شر امنيات فقط لا ترقى للتنفيذ

57357

2008-09-13T22:01:00.002+02:00

كل سنة وانتم طيبين الاول

>>>>>>>>>> مش عارفة لية بتغظنى اعلانات مستشفى سرطان الاطفال

اولا مش عارفة لية كل الافتخار والاعتزاز بالمستشفى مع ان المفروض ان احنا نكسف مش نفتخر

نكسف ان احنا عندنا اكبر عدد من الاطفال عندهم سرطان علشان الى ربنا يديهم علىق د نيتهم دخلوا زراعات مسرطنة , كمان حاجة غريبة البنت الصغيرة بتقول جملة الصراحة حاسة انها مستفزة جدا

بتقول اية بقى >>>> ( انا لقيت المستفشى حلوة قوى وياريت الكل يتبرعلها )

هى بقى بتحسسنى وكانها بتقول ( انا لقيت المستشفى حلوة قوى وياريت الكل يجى هنا )

حاجة تفقع !!!!!!!

المستشفى دى بالذات انا مش بحب اتبرع لها بحاجة ابدا لية بقى

لان هما ايام ما كنت فى الجامعة كانوا بياخدوا تبرعات اجبارى من الطلبة من ضمن المصاريف تخيل انت بقى فى كام طالب جامعى فى مصر وبياخدوا منة تبرع اجبارى يعنى شوف بيلموا كام فى السنة !!!!!!!!!

وبعد كل دة يقلك ياريت تتبرعوا يا نهااااااااار داحنا ناقص نجوع علشان المستشفى
_________________________________________

فى اول رمضان قريت اعلان عن قناة للمسلسلات مش فاكرة اسمها المهم بتعلن عن المسلسلات الى هتتعرض فى رمضان والصراحة كانت كمية مهولة

المهم كانوا كاتبين اية بقى

من الفطار للسحور !!!!!!!!!!

وكأنهم بيقلوا من الاخر كدة ما فيش عبادة بعد الفطار ولا اى حاجة انت بس عليك تفتح التليفزيون وتتفرج من الفطار للسحور وبلاس كمان تصلى الفجر انت بس تسمعة وتدخل تنام

يا الله

وكأن رمضان الصبح بس وبليل اى شهر تانى مالوش علاقة برمضان !!!!!!!!!!!!!!!!

ربنا يعافينا من الجمل الغريبة الى بتتقال ويمن علينا بناس تكون ذكية فى التسويق

________________________________

النكتة الى فى اخبار اليوم النهاردة الصراحة جامدة جدااااااااااااااااااا والى مش قراة انا هنقلها هنا بالنص

اهى

>>>> الدعاء مستجاب فى رمضان <<<<

يارب يا قادر ياللى زحزحت الجبل من مكانة ... تزحزح الحكومة الى كابسة على قلبنا كفاية عليها كدة بقى

( فكرة رئيس التحرير , ريشة شيماء الحداد ) والجبل المقصود جبل الدويقة او المقطم

وبس كدة دى كانت شوية حاجات نفسى اتكلم عنهم وبس خلاص

ارجع يا مظبطنا

2008-09-07T14:47:00.005+02:00

بسم الله الرحمن الرحيم

كنت قاعدة عمالة افكر فى موضوع اكتبة وفى الاخر قلت طب اما الف على المدونات الى بحب ادخلها وكان من ضمنها مدونة تيمى ( تظبيط )

واذ بى افاجأ انة هيلغى المدونة وانة مش هيدون تانى؟؟؟؟؟؟؟؟؟؟؟؟؟؟؟؟؟؟

والسبب انة على سبيل الفرض وفى اعتقادى يعنى والله اعلم ارتكب كام ذنب او معصية

ونسى ان الله جل وعلا والذى قولة هو الحق بيقول اية فى كتابة العزيز

اعوذ بالله من الشيطان الرجيم

بسم الله الرحمن الرحيم

«قل يا عبادي الذين اسرفوا على أنفسهم لا تقنطوا من رحمة الله ان الله يغفر الذنوب جميعاً، انه هو الغفور الرحيم» (الزمر:53)

وكمان

{ وَنَفْسٍ وَمَا سَوَّاهَا فَأَلْهَمَهَا فُجُورَهَا وَتَقْوَاهَا }

نسى ان كل واحد فينا لية ذنوب وخطايا ولو كل واحد فينا اطلع على ذنب غيرة لحمد الله على ذنوبة ان صح تعبيرى , حاجة كمان الانسان خلق خطاء( كثير الخطأ ) وفى حديث للرسول بيقول ان لو ماكناش بنخطئ ونذنب كان ربنا اتى بقوم يخطئون ليستغفروا فيغفر الله لهم

, كمان فى مقولة تقريبا لعلى بن ابى طالب فيما معناها ان الايمان فى القلب يقوى ويضعف فيجب اغتنام الايام الى الايمان فيها قوى ونعمل الكثير من الطاعات والعكس الايام الى فيها القلب فية ملل وبعد نكتفى فقط بالطاعات المفروضة >>>>>>> يمكن الجملة دى بعيدة عن الموضوع بس مهمة بردة

ها يا تيمى دا انت الى كنت بتقول حق لاصحاب الكؤوس ان يتناصحوا , وانت بردة الى قلت ونقلت عن شيخونا ان الانسان ممكن يفضل عمرة كلة يجاهد للتخلص من ذنب او معصية معينة

وبعدين رب معصية اورثت بعدها طاعات كثيرة

ايوة والله يا تيمى بتحصل معايا كتير احيانا بعد الذنب او المعصية الاقى نفسى حاسة بندم بعدة اقبال على الطاعة ليغفر الله لى وكان المعصية جت علشان تفكرنى انى تراخيت فى الطاعة واشد حيلى فيها شوية

يا تيمى انا هقلك على حاجة اذا كانت نفسك مصورة ليك انك اوحش واحد فى الدنيا وانك شيطان , فا افتكر بردة ان من رحمة ربنا بيك انة ابصرك بعيوبك وبذنوبك وان فطرتك عندها نفور من الذنوب

فى غيرك كتير بيعملوا الذنوب وهما فاكرينها حسنات الله يهديهم يارب

يا تيمى ومش هقلك تانى ما فيش حد بلا ذنوب وخطايا

فادعى ربنا بقلب مخلص انة يثبت قلبك على الطاعة

وانا من موقعى هذا يا تيمى بقلك ارجع تانى علشان في كتيييييييير بياخدوا طاقة من كتاباتك >>> ودى كلها حسنات ليك يا عم مين قدك >> حسد هههه

خدلك فترة استرجع فيها نفسك وظبط امورك زى ما ظبط امورنا وربنا يهديك للخير دايما يا تيمى وييسرلك الطاعة

___________________________________________

توضيح مهم

انا كتبت البوست علشان انت يا تيمى لاغى خاصية التعليق ومش عارفة احط كومنت عندك

مش بشردك والله , لاحسن تفهمنى غلط
واتمنى يا تيمى انك مش تزعل منى والله ما كتبت البوست دة الا لانى بجد مش عايزاك تستسلم

تحديثثثثثثثثثثثثثثثثثثثثثثثثثثثثثثثثثثثثثث

الحمد لله تيمى رجع بالسلامة من حالة الاكتئاب الحاد ورجع تانى للتدوين وربنا يهدية دايما ويثبتة على الطاعة

انا مش عارفنى

2008-08-22T09:01:00.003+03:00

الصور صعبة صح ؟!

بس مش دة شئ وارد ان احنا نوصل للسن دة ؟ الصراحة وانا بلعب فى النت لقيت الصور دى واتصدمت للوهلة الاولى وبعدين قلت اكيد هما كمان مصدومين وماكنش فى بالهم ان دة ممكن يبقى شكلهم । الصراحة شئ صعب قوى ।مش ان الانسان دة يبقى شكلة لا الصعوبة فى ان الانسان يوصل للعمر دة وفى الى ممكن يتأفف منة والى مايرداش يساعدة والى والى .......... كتير

انا كنت بشوف ناس لما تشوف حد كبير كدة تقول على سبيل التريقة هما لسة عايشين يرحوا يموتوا بقى هههههههه >>> الضحكة دى منهم مش منى انا ,اعتقد لو الشخص دة كبر ووصل للعمر دة وسمع حد بيقول كدة علية هتبقى صعبة قوووووووى , اكيد فى ناس من الكبيرة دى كانت عايشة حياتها بالطول وبالعرض ومنهم الى كان ممكن يكون رياضى وبيشيل حديد ودلوقتى ما بيقدرش يشيل كباية مية !!!!!!!!!!!

اكيد يعنى لما بيفكر فى حالة بيكون حزين , طب هو محدش فينا فكر فى الناس دى بشكل مختلف وان احنا نساعدهم او نبصلهم بنظرة مختلفة يمكن فى يوم من الايام احنا كمان نكبر زيهم ونلاقى الى يساعدنا مش يتريق علينا ....

اعتقد ان كل خط وكل تجعيدة فى الوش بتحكى حكاية وخبرة سنين طويلة ।

بس مش لاقية حاجة تانية بصوا انتم بقى للصور وفكروا مع نفسكم واقوا كلمات الاغنية الى جاية

انا مش عارفنى
انا كنت منى
انا مش انا
لا دى ملامحى
ولا شكلى شكلى
ولا ده انا
॥أبص لروحى فجأة
- لقتنى لقتنى كبرت فجأة - كبرت
تعبت من المفاجأه ونزلت دمعتى
قوليلى ايه يا مرايتى
قوليلى ايه حكايتى تكونشى تكونشى دى نهايتى واخر قصتى॥
يا دنيا طفيتى شمعى
يا ناس كترتوا دمعى
والعمر راح هدر
كتبت الاّه بألمى
كسرتوا سن قلمى
وبرده باقول قدر
حزين من صغر سنى
ومين على الاّه يعينى
ووخدانى الخطاوى لسكة تايهة منى
॥أبص لروحى فجأة - لقتنى لقتنى كبرت فجأة - كبرت تعبت من المفجأه ونزلت
دمعتى قوليلى ايه يا مرايتى قوليلى ايه حكايتى تكونشى دى نهايتى واخر قصتى

॥انا كنت منى
انا مش انالا دى ملامحى ولا شكلى ده ولا ده انا
॥ياليل الجرح يالى معايا زى ضلى مأنس وحدتى

سرقت العمر كله خلاص
ما بقاش فاضلى غير جرحى ودمعتى
جريح وده مش بيدى
ماخدتش بس بأدى
زرعت يا ناس وردى جنيت الشوك لوحدى..
أبص لروحى فجأة - لقتنى لقتنى كبرت فجأة - كبرت
تعبت من المفاجأه ونزلت دمعتى قوليلى ايه يا مرايتى
قوليلى ايه حكايتى تكونشى
تكونشى دى نهايتى واخر قصتى
॥انا مش عارفنى انا كنت منىانا مش انالا دى
ملامحى ولا شكلى ده
ولا ده انا

((( الاغنية لعبد الباسط حمودة __ اغنية حلوة قوى وومعبرة كمان قوى )))

الى مقدرش اغيرة اتأقلم علية

2008-08-12T20:49:00.003+03:00

ايوة

الى مقدرش اغيرة اتأقلم علية

دة مبدئى والى انا شخصيا مقتنعة بية وبطبقة فى حياتى

لان فى حاجات كتييييييييييييييييير قوى فى حياتنا الواحد ما بيملكش انة يغيرها او مستحيل او صعب انة يغيرها فى كل الحالات دى الى قدامنا اية ان احنا نتأقلم علية

فى ناس اعرفها تلاقى نفسها قدام وضع مش قادرة تغيرة ,تعمل اية تلاقيها تعاند فية وتعاكس ولا هى بتفوز بتغير الوضع ولا الوضع بيتغير

يعنى كمثال مثلا حال البلد دلوقتى وان ما فيش فرص مناسبة للخرجين وان كل خريج بيخرج يشتغل فى غير تخصصة خالص دة لو اشتغل من الاساس

طب الوضع دة هل مستحيل تغيرة لا طبعا بس صعب وهياخد وقت ممكن سنين وقرون بس هيتغير

طب احنا نعمل اية عقبال ما يتغير .................... نقلب نعيشنا احنا بقى وما نقلش لا اصل دة مش تخصصى ولا هو المرتب المجزى طب ماهو انت ما تتأمرش بقى وقلب عيشك لغاية ما تلاقى الفرصة المناسبة وبعدين يعنى ما كلها خبرة يعنى مش هضرك فى حاجة +وبعدين اذا ماكنش الشاب مننا يتعب فى شبابة هيتعب امتى يعنى , وبعدين يعنى هو مضيقة قوى انة مش هيشتغل فى تخصصة وال يعنى كان بيطلع من الاوائل او مش مكسوف وهو بياخد مصروف من اهلة دلوقتى بنلاقى شاب زى ضرفة الباب وبياخد مصروف لسة حاجة تكسف والله , دة غير ان الشغل بيجيب شغل ودى شفتها كتييييييييييييييييييير سواء على المستوى الشخصى او الناس المكافحة ممكن تلاقيها كانت شغالة فى شغلى بسيطة جداااااا ومع الوقت بدات تتعرف على ناس يدولها على شغل افضل وافضل وهكذا لغاية ما بيوصل للمكانة الى كان يتمنها واحسن كمان

اوضاع كتير فى حياتنا مش بس الشغل لا كتير بنلاقى ناس مصابة بتشوهات خلقية وامراض صعبة وشلل فى الاطراف ونلاقيهم بيعملوا المستحيل علشان يحققوا وما قلوش اصل انا وضعى مش هقدر اغيرة وصعب انى اتعامل معاه بالعكس اتأقلم معها وحقق الى هو عايزة واحسن كمان من الاصحاء

كتييييييييييييييييييييييييييييييييييييييييييييييييير وهفضل اقول كتيييييييييييييييييييييييييييييييييييييييييييييييييير

الى ماقدرش اغيرة اتأقلم علية

خدوها حكمة منى وطبقوها صدقونى هتنفكم كتير

يلا ما نملكش غير ان احنا نقول

ان لكل مجتهد نصيب ((( حكمة بس بجد سليمة واحنا الى كنا بنتريق عليها واحنا صغرين عرفت قيمتها لما كبرت فعلا )))

مش معقولة خالص مالص يعنى

2008-07-24T23:30:00.004+03:00

مسا الخير على اهل الخير

مش معقولة نبقى بلد النيل ونص البلد شغالة فى بيوتها بفلترات والمية ليها طعم وريحة وفيها كمان فتات اكل

مش معقولة خاااااااااااالص

مش معقولة بردة نبقى عايمين على غاز ونص البلد لسة مش واصلها غاز والى واصلهم دافعين فية قد كدة المفروض اى بلد متوفر فيها ثروة طبيعية بتكون ارخص ما يكون لاهل البلد مش العكس غالى على اهل البلد رخيص للناس برة

مش معقولة نبقى بلد الحضارة والاثار واحنا نصنا مايعرفهاش ولا حتى شفها الا بس فى التلفزيون

ومش معقولة بردة نبقى بلد اسلامى وعربى ومحلات الخمور شغالة مية مية احسن من محلات العرقسوس

ومش معقولة بردة اطلاقا يبقى عندنا احسن امخاخ فى العالم وناس افذاذ ونبعت نجيب ناس من برة ال اية علشان نستفيد منهم , دى حتى حاجة تكسف قوى

ومش معقولة خالص بردة نبقى بلد اسلامى ودينى ومافيش فى تعاملتنا اى حاجة دينية خالص كدة دة حتى ربنا يغضب علينا

لا بجد الحاجات الى مش معقولة فى البلد كترت قوى زيادة عن اللزوم । بفكر ابقى اعملها جزء تانى وتالت كل اما ابقى افتكر شوية حاجات

يلا تصبحوا على خير

لا تعليق

2008-07-12T17:38:00.003+03:00

كتير بتقابلنا مواقف بنسمعها او نشوفها ونتصدم ونسكت ونكمل حياتنا عادى بس للاسف المواقف دى بتسيب جوانا علامات استفهام كتيرة قوى هسيبكم مع المواقف الى انا عيشتها ومش بكتبها علشان عايزة تفسير او بقلها علشان اتكلم عنها ابدا لا خالص بس هى مجرد فضفضة

>>>> فى مستشفى الاورام بالزقازيق كنت هناك من كام سنة قبل ما تجدد وتنضف وتتعمل سيراميك وحاجات حلوة المهم انى صدف فى يوم طلبت منى ممرضة انى اجيب ملاية لسرير المريض الى انا كنت معاه واذا بى وانا بجيب الملاية اكتشف ان تحت الملاية دى مستعمرة صراصير من كل حجم ونوع وسلالة اة والله العظيم وربنا شاهد وانا شفت كدة وصرخت والممرضة قعدت تضحك وكانى مثلا اتخضيت من فراشات طايرة دة غير طبعا ان القسم كانة فين قطط كتير بتشارك المرضى اكلهم وسرايرهم وكل حياتهم وطبعا الصراصير دول اهل واصحاب المستشفى الاساسين ,,,, بس الحق يقال بعد ما اتنضفت واتعملت سيراميك ما عدش فى حاجة من دى ॥

-----------------------------------

كنت مع صحبتى فى مرة بتعمل الخدمة العامة بتعتها وكان من ضمنها ان فى ندوات بتقام , المنهم رحت ندوة معاها فى مرة وبسالها هو انتم اية الى جابركم تحضورا ندوات ؟؟ قالتلى علشان دة فية غياب وحضور ,

قلتلها يا سلام يعنى الندوات الى بتحصل فى التى فى دى كلها ناس بتوع الخدمة العامة وناس متاجرين

قالتلى اه امال الندوات دى مين الى هيحضرها غيرنا احنا هههههه

المهم بقى لما هى الندوات بياجروا ليها ناس بتتعمل لية اصلا ما دام مش مفيدة ومحدش بيحضرها الا بالعافية

ولا تعليق

--------------------------------------

مرة واحدة قريبتى منفصلة عن جوزها وفيى بينهم قواضى نفقة ومشاكل وهكذا المهم مش دة موضعنا

من ضمن كلامها لقيتها بتقول دة المحامى بياخد منى غير اتعابة فلوس من نفقة بنتى

والحاجب بتاع المحكمة وكمان الراجل الى بيستلم الفلوس من طليقى وعقبال ما الفلوس بتوصلى بيكون تلت اربعها طار على الموظفين .......

ولا تعليق

فى مواقف غير كدة كتير فى حياتنا واكيد عند الناس كلها بس زى ما قلت اهى فضفضة وخلاص

الاوتوبيس

2008-07-04T19:19:00.003+03:00

السلام عليكم جميعا

لسة جاية امبارح من قاهرة المعز الى هى فعلا اسم على مسمى حقيقى هى بتقهر اى حد يروحلها وبتذلة وتحسسة انة ولا حاجة

الموضوع دة بالذات حاطة علشان اتوبيسات القاهرة واعوذ بالله منها وربنا يكفينا شرها

انا فى رائ دى عبارة عن كوارث اخلاقية ماشية على ارض المحروسة , حقيقى والله بدون مجاملة

انا ركبت الاتوبيس من هنا وكانى فى علبة تونة كلة لازق فى كلة وما فيش بقى حاجة اسمها راجل وست كلة ملزق فى بعضة والى يغيظ ان سواق الاتوبيس مربى دقنة والمفروض انة يعنى عارف ربنا وكل محطة يركب ناس وما فيش حد بينزل وال اية يا جماعة ارجعوا ورا الاتوبيس فاضى !!!!!!!!!!!!!!!!!!!!

فاضى يا اخى حس على دمك دة الاتوبيس ما كنش فية نفس حتى الناس تعرف تشم هوا نضيف

والله الى بيحصل دة عيب قوى دة الاتوبيس دة غلب الكباريهات انا مش فاهمة ازاى المسئولين ما يطلبوش ان عدد الركاب يكون محدد بعدد الكراسى او على الاقل تكون الزيادة بالشكل المعقول يعنى عشرة افراد واقفين ماشى انما مش مية واقفين وفوق بعض دى اسمها قلة ادب , وبعدين المفروض يكون فية جمب للستات وجمب للرجالة ما ينفعش تكون العملية سداح مداح كدة

بس الواحد هيرجع ويقول هما المسءولين مش حاسين بحاجة اصلا لانهم مش بيركوبا اتوبيسات زينا دول بيركبوا مرسيدس اخر موديل ومش حاسين باى حاجة

يلا ربنا يدهم كمان وكمان على قد نيتهم يارب ويعينهم ويعينا احنا كمان

معقولة مصر ما فيهاش !!!!!!!!!!!!!!!!!!!!

2008-06-27T17:13:00.003+03:00

بسم الله

يا ترى هو معدش موجود فى مصر اى مواضيع تصلح انها تتعرض على السينما غير مواضيع الشذوذ والخمور والجنس والكوميديا مصر كلها من جوة بقت خمرة وجنس وفحش وفجور وكوميديا سخيفة !!!!!!!!!!!!!!!!!!!!!!!!!!

معرفش لية فى السينما دلوقتى كل الافلام الى طالعة لازم يبقى فيها يا اما حتة عن الجنس ومشتمالاتة او الفيلم كلة بيبقى مشاهد والفاظ قلة ادب واقل ما يقال عنها انها عبارة عن ردح

او الفيلم عبارة عن كوميديا عبيطة

شئ يغيظ يعنى مصر بجلالة قدرها ما فيهاش موضوعات تاريخية او دينية او اجتماعية او درامية او حتى فاتنزية ويا مكتر الفانتازيا فى مصر .....

الى يفقع اكتر ان بقت كل الافلام الى فيها قلة ادب سواء مشاهد او الفاظ هى الى بتحصد الجوائز مع ان المفروض دى يتحسب على الفيلم مش لصالح الفيلم لان المفروض ان احنا فى بلد عربى دينى ( اسلامى مسيحى ) والمفروض ان اى مشاهد او الفاظ غير لائقة يا اما تتحذف او تقلل من جودة الفيلم ....

والى بيقول ان المشاهد دى من صميم الفيلم اعتقد يعنى مشهد كدة ولا كدة لو اتشال مش هيأثر ابدا على سير الفيلم او نصة هو ممكن اه يأثر بس على الايرادات ودة كمان احتمال بعيد لان فى اسر وناس ما بترضاش تدخل الفيلم علشان مشاهدة >>>> اى نعم بيتفرجوا علية خلسة على الكمبيوتر انما فى الاساس هما رافضينة ولو كان خالى من المشاهد كانوا هيرحوا بعين قوية ويتفرجوا علية فى السينما بدون احراج

مع علينا يعنى

واذا كان يعنى المشهد مهم للدرجة لسير الفيلم اعتقد فى حاجة اسمها ايحااااااااااااااااااااااااااااء يعنى مش لازم التفاصيل, التفاصيل مش مهمة فى حاجة الا اذا كان بقى الفيلم للتثقيف الجنسى فا دى حاجة تانية !!! انما ما يبقاش الفيلم كوميدى وفية مشاهد والفاظ جنسية ونقول ما ينفعش تتحذف علشان هتخل بنص الفيلم دة يبقى اسمة استهبال !

اووووف وكفاية كدة علشان دمى اتحرق الصراحة .

احنا زى الورد

2008-05-24T17:33:00.002+03:00

احيانا كتير الواحد بيبقى كارة او مش حابب صفة فية سواء شكلية او معنوية , وفى الى بيتأقلم مع الصفة دى وفى الى بيحطها فى دماغة ويفضل يكرها كل مرة يفتكرها ।

بس احنا لو جينا فكرنا فى كل الصفات الى فينا وفكرنا ياترى لو الصفة الى مش عاجبانى دى ما كنتش موجودة ياترى كنت هكون انا بردة دلوقتى ؟؟؟؟؟ اعتقد الاجابة هتكون لا

لان تغير اى صفة بيغير تركيبة الشخص نفسة او الشكل المعروف بية , ازاى .... اقلك مثلا واحد رغاى قوى وهو عارف كدة عن نفسة ومش حابب الصفة دى وكان يتمنى لو كان مش رغاى । ياترى لو الشخص دة مش كان رغاى كان هيبقى هو نفسة الشخص المعروف وسط اصحابة بالصفة دى والى بتميزة والى اصحابة احيانا بيحبوا يكلموا علشان يسليهم ياترى لو كان هادى كان ممكن حد هيجى ويتكلم معاها ممكن طبعا انما كل صفة بتميز انسان عن غيرة .

الى عايزة اوصلة ان الانسان مجموعة من الصفات استحالة هتبقى كلها مثالية واستحالة ان بردة اى انسان هيبقى كلة صفات وحشة كلنا فينا الحلو والوحش وان لولا الوحش مع الحلو مكناش هنبقى احنا بشخصيتنا

على سبيل المثال التوضيحى الفنان علاء ولى الدين الله يرحمة كان لية صفات حسمانية مميزة لية وكنا بنحبة كدة واعتقد ان ماكنش فينا حد يتخيل انة يكون مختلف عن الشكل دة واتقبلناة كدة لان دة الشكل المميز لية

يعنى تعالوا نتخيل كدة لو كان مثلا رفيع او كان وسيم قوى اعتقد انة كان هيبقى شخص تانى مختلف تماما عن علاء الى نعرفة ।

ودة بينطبق على حاجات كتير فى حياتنا ان فى حاجات ممكن ما تكونش مرغوبة فينا بس هى ضرورية وبتكمل شخصيتنا المميزة عن اى حد تانى ।

وعلى فكرة دى مش دعوة ان محدش يغير نفسة لا بالعكس الانسان مطلوب منة انة يحسن دايما نفسة ويطورها للافضل دايما ...

بس فى احيانا حاجات ما نقدرش نغيرها او تغيرها هياخد وقت فاعلى الاقل عقبال ما تتغير نتأقلم معها ونتقبلها على انها صفة بتميزنا عن غيرنا ॥

مش عارفة اذا كانت فكرتى وصلت ولا لا بس الموضوع كان كتير بيجى على بالى ان الانسان استحالة هيكون مثالى فى كل حاجة وانة لازم يرضى الاخرين لان الاخرين دول بردة فيهم صفات وحشة وممكن مش تكون باينة لينا ।

لان دة شئ من المستحيلات المؤكدة ان ما فيش انسان كامل فى كل حاجة ....... اممممممم حاسة انى هدخل فى مواضيع تانية وهكتفى بهذا القدر الان

وفى الاخر احنا زى جنينة الورد كل وردة ليها شكلها وريحتها المميزة عن غيرها ...

مهما اتقدمنا ((२))

2008-05-16T17:52:00.002+03:00

يا هلا فيكون جميعا

دى تكملة البوست الى فات

وهى عبارة عن ......... اقروا وانتى تعرفوا بلاش رغى كتير

زمااااااااااااااااان كنت بستنى اغانى ام كلثوم على اذاعة الاغانى فى السهرة الساعة 11وكنت ادنى افكر يا ترى اية الاغنية الى هتتذاع ياترى اغنية بحبها ولا لا وكنت اتمنى ان يكون عندى كل اغانى ام كلثوم اسمع فيها زى مانا عايزة وكل الاغانى القديمة ولما جبت الكمبيوتر طبعا بقى عندى كل الاغانى القديمة بس للاسف ما بحسش بنفس المتعة الى من الراديو يمكن نسبة المتعة لا تتعدى 30فى المية

بردوا زمااااااااااااان كنت احب القراية قوى واحب المجلات واشترى كتب وكنت اتمنى يبقى عندى مكتبة كبيرة فيها كتب لكل الكتاب وكنت بحس بمتعة جميلة جدا فى القراية ولما جبت الكمبيوتر بردة بقى عندى كتب لكتاب كتير واقدر اجيب اى كتاب انا عايزة بس للاسف لما جيت اقرى الكتب ما حستش باى متعة بالعكس حسيت انة ممل جدا وان متعة القارية تمكن فى كتاب تقدر تمسكة وقت مانت عايز وتقلب فى صفحة براحتك ॥

بردة زمااااااااااااان كنت احب اتفرج على الافلام الاجنبى على القناة التانية وكمان البرامج بتاعة هذا المساء وبانورما فرنسية واخترنا لك وكنت احب اتفرج وياترى هيجبوا فيلم اية وياترى هيكون حلو ولا لا ولما جبت الكمبيوتر بقى عندى افلام واقدر اتفرج على اى فيلم بس اعتقد ان متعتة مش بردة زى متعتة الفيلم الى تقعد تستناة اسبوع او اكتر علشان تتفرج علية ...

بردة زماااااان كنت بحب انى ادون على الورق اى حاجة واقطع جرايد ولما جبت الكمبيوتر وجيت امارس موضوع النوتبوك ليقيتة ممل جدااااااااااا ولقيت ان الاسهل هى الورقة والقلم تمسكهم وقت ما انت عايز وتشتطب وتشخبط براحتك ....

بردة كتير قوى بقضى وقت على النت اكلم اصحابى واضحك معاهم واهزر بس بيجى وقت بحن لانى اشوفهم ويشفونى واتكلم معاهم وجها لوجة واخرج واتفسح معاهم بعيد عن الكمبيوتر الى تقريبا متعتة بتبقى وقتية وبمجرد ما بيتقفل خلاص كل المشاعر بتتقفل معاه

امممممم انا ما انكرش ان الكمبيوتر مهم جدااااا ومهم بالنسبالى وانا عن نفسى ما اقدرش استغنى عنة ابدا بس بيجى وقت واكتشف ان الحياة مش معقولة كلها هتبقى كمبيوتر ونت ومتعلقة بية لازم الانسان ينفصل شوية عنة ويرجع للقديم تانى سواء بقى كان قراية كتاب او خروجة مع صديق او حتى كتابة مذكرات على الورق من تانى او تشغيل الراديو مرة بليل على اذاعة كنت بتحبها قبل ما يكون عندك كمبيوتر

اعتقد ان الرجوع للقديم مفيد للصحة النفسية جدا للانسان لانة ساعتها هيديلة شعور بالسعادة غير قابل للوصف

مش عندى حق ولا اية انتم اية رائيكم فى الموضوع دة ؟؟؟؟؟

مهما اتقدمنا

2008-05-11T16:30:00.003+03:00

مهما اتقدمنا هنفضل بردة نحن للقديم والماضى والحاجات الكلاسكية الى اتعودنا عليها حتى لو عندنا البدايل الحديثة ليها انما دايما القديم لية سحرة وذكرياتة الحلوة

يعنى مهما بقى عندنا احدث اجهزة الكمبيوتر والموبيل الحديثة هتفضل الورقة والقلم افضل واسرع واسهل وسيلة لتدوين اى شئ ॥

بردة مهما اتقدمنا وامتلكنا كل وسائل الترفيهة الى فى الدنيا كلها عمرها ما هتكون زى تمشية ساعة مغربية مع اصدقاء العمر ...

بردة مهما كبرنا وبقينا شباب هنحن دايما لفترة الطفولة الى عشنا فيها اجمل لحظات السعادة فى العب والفسح والخروج .....

مهما امتلكنا لاحدث الاجهزة الموسيقية ام بى ثرى او او او او هيفضل الراديو لية سحرة تحطة جمب السرير وتشغلة على برنامج هو الى يختارلك الاغانى ويرتبها وتيجى اغانى على مزاجك وتنسجم معاها مش جهاز انت الى تظبطة وعارف اية الاغنية الى بعدها ....

مهما اتقدمنا بردة وبقيت وسائل الاتصال حديثة بين الاحباب هتفضل التعبيرات القديمة والكلاسيكية زى جواب معطر ببرفان جميل او وردة حمرا او اغنية هدية اى نعم هى وسائل قديمة قوووى ويمكن انقرضت بس تعالى تخيل نفسك وانت جايلك جواب متعطر ببرفان انت بتحبة وتلاقية من حبيبك اكيد اكيد هيبقى لية سحر تااااااااااانى خالص غير لو جالك نفس الكلام على الايميل .....

الموضوع لية تكملة ابقى استنونى فيها

جامعة الازهر

2008-05-02T10:48:00.003+03:00

صباح الورد والفل والياسمين

جامعة الازهر من المفترض انها فى الاساس جامعة دينية بحتة تختص بعلوم الدين كافة وتهتم بتدرسها والبحث فيها

مش عارفة ابة بقى الى حصل وخلاها جامعة عادية تضم كافة المجالات + الدين انا شايفة انة شئ مش حلو خالص لسبب ان اغلبية الى بيتخرجوا من الازهر من الكليات موضوع الدين عندهم بيبقى ثانوى مش اساسى على غير المتوقع ان دة خريج ازهر وحافظ القران كامل واحاديث

لا الى بيحصل انة بيتخرج مالوش اى علاقة بالدين غير انة فقط منتسب لجامعة الازهر

معرفش اية الى خلاهم يقحموا الكليات العامة فى الازهر , مش من قلتها برة الازهر فهو قرر يدرسها_ دى مرطرطة برة _ انما الى نادر وجودة او منعدم هو الكليات الى بتختص بتدريس الدين فقط

انا من رائ الازهر يرجع تانى جامعة تختص بعلوم الدين فقط لا غير علشان على الاقل يتخرج منها شيوخ وشباب فاهمين يعنى اية دين بالظبط ويكونوا على حق ناس دارسة دين وعلومة مش انصاف متدينين.

الموت

2008-04-18T10:28:00.002+02:00

ياترى احنا بنخاف من الموت لية ؟؟؟؟؟؟؟؟؟؟؟؟؟؟

هل مثلا علشان هنفارق الى بنحبهم , ولا علشان مثلا هنفارق ملذات الحياة , ولا علشان ذنوبنا .......

اعتقد فى رائ ان اكبر اسبابنا بيكون الخوف من الموت خوفا من مواجهة الرحمن ومن ان ذنوبنا كتيييييييييييييييييرة وملحقناش نمحيها

والا لية فى ناس كانت بتبقى مبسوطة بقرب اجلها زى مثلا الرسول علية افضل الصلاة والسلام والصحابة لانهم عارفين ان ذنوبهم كانت بسيطة وكانوا فرحين بلقاء الرحمن مش خايفين

الحياة حلوة اه بس الموت ممكن يكون احلى واحلى لو كانت حياتنا فى ظل طاعة الرحمن ساعتها هيبقى الموت احلى بكتير لانك هتكون مع الرحمن فى جنة الخلد مخلدا لا تموت ابدا ......

دة موقع ممكن يفكر ناس ويصحيها من غفتلها مش هياخد وقت على الاقل اتفرج على الصور الى فية

www.saaid.net/Minute/mm1.htm

السجن افساد وترويع

2008-04-12T16:28:00.002+02:00

السلام على اهل السلام

ندخل فى الموضوع على طوووووووول

المفروض ان السجن عبارة عن مكان بيقضى فية الشخص المذنب فترة عقوبة على فعل خطأ هو ارتكبة علشان لما يخرج للمجتمع يكون انسان صالح واعى ويكون واعى بالخطأ الى ارتكبة وما يكرروش تانى ।

انما بقى الى بيحصل عكس كدة خاااااااااااااااااالص الانسان بيدخل السجن وهو حاسس بشئ من الندم ومجرد ما بيقضى فترة العقوبة بيحس باحساس فظيع بالنقمة على المجتمع لعدة اسباب اولا ما فيش مكان ادمى يقضى فية فترة عقوبتة السجون اقرب للزرايب منها للاماكن المخصصة بالاداميين । غير كدة المعاملة الغير ادمية بالمرة يعنى تلاقيهم بيشتموا ويضربوا ويتعاملوا على اساس انهم يعنى كفروا وللاسف ما بيعترفوش ان بمجرد انهم بيقضوا فترة عقوبة دى فى حد ذاتها مش محتاجة اى عقوبة جمبيها تانى يعنى المفروض يعامل بشكل محترم مهما كانت جريمتة والمفروض ماننساش اننا كلنا لينا اخطأنا وذنوبنا بس الغير مكتشفة ।

كمان ما فيش برامج توعية او تدربية للمساجين او انشطة تخليهم يبقوا افراد صالحين بالعكس السجن بيسبهم فاضين ولا بينمى عندهم اى حاجة اطلاقا غير الكره لنفسهم وللبلد والحال الى وصلوا لية ।

المفروض يبقى فى كوادر مخصصة للتعامل مع هؤلاء الافراد ورجال دين ومدربين لتكوين افراد مختلفين واصلاهم علشان يخرجوا للمجتمع افراد مختلفين تماما نقدر نتعامل معاهم بشكل سلمى

حاجة كمان فى ناس من اصحاب النفوذ لما بيدخلوا السجن بيحسسونى كانهم داخلين منتجعات سياحية غرف خاصة وتلاجات خاصة وتليفزون وهيصة وكانهم مش بيقضوا فترة عقوبة على جريمة

المطلوب الاعتدال يعنى لا نديهم غرف مرفهة وكاننا بنكافئهم ولا غرف كانها زربية وكانهم حيوانات ।

دة كان جزء من موضوع كبير جدا وهو السجون والسجناء

ما فيش اعتقلات فى مصر

2008-04-10T10:15:00.002+02:00

كان على قناة الجزيرة مستضفين واحد تقريبا نائب رئيس تحرير جريدة حكومية وتقريبا اسمة طارق حسن او حسن طارق

وبيتكلم عن مظاهرات يوم ६ ابريل ومن ضمن الحديث راح قايل جملة الصراحة كانت عجيبى قوى

بيقول اية بقى

مصر مافيهاش اعتقلات !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

ولا تعليق من عندى الصراحة

شجع منتج بلدك

2008-03-30T00:52:00.002+02:00

صباح الخير بعد نص الليل

فكرة الموضوع دة جاتنى امبارح وانا عينى بتروح فى النوم وقلت لازم ابقى اكتبة المهم

كل شوية نسمع عن شجع منتج بلدك شجع منتج بلدك

وتيجى تشجع ما تلقيش اصلا منتج وان لقيت لقيتة ما يستهل التشجيع خاااااااااالص

وان كنت طيب قوى واشتريتة بردة رغما عن انة سئ هتبقى كدة بتضرة مش بتشجعة

ازاى

احنا اصلا المفروض بنشترى الحاجة المفيدة لينا مش الى هضرنا

والضرر هنا مش بس جسدى لا دة مادى ومعنوى

بمعنى انى لما اشترى جهاز مثلا ويكون مش كويس اكيد هبقى كدة انا اتعرضت لخسارة مادية ومعنوية لانى مش مستفيد من الجهاز كما يجب وشجعت ناس الى هما مصنعين الجهاز على انهم ما يحسنوش التصنيع بتعهم

الى عايزة اوصلة

ان احنا اه نشجع منتج بلدنا بس لما يكون كويس انما ما يكونش وحش ونشرتية كدة احنا بنخلى صاحب السعلة ما يبذلش جهد انة يحسنها لانة لاقى الناس بتشتريها وهى بحالتها التعبانة دى يبقى يحسنها لية انما لما يلاقى ان الناس مقبلة على السلعة المنافسة لية اكيد هيحاول يحسن سلعتة ।

كمان الى شغالين فى الاعلام والى كل شوية يقولوا شجع منتج بلدك يقلولنا فين الاول منتجات بلدنا لان بلدنا بقت كلها حاجات صينى ويابانى وكورى لان اصلا لما بتبقى فى حاجة كويسة الناس بتشتريها وبتدور عليها ومش هتبقى محتاجة ان حد يقلها اشتريها زى القطن المصرى الى كل بيدور علية وبيشترية اى نعم هو اغلى شوية بسيطة بس كويس والناس بتشترية وبتدورعلية علشان صناعة نضيفة انما غير كدة ما فيش

مش كدة ولا انا غلطانة

المفروض ما نستغربش

2008-03-19T09:12:00.004+02:00

السلام عليكم جميعا

(دايما فى بداية كتابة اى موضوع مش بلاقى بداية حلوة ابدء بيها او تكون مقدمة ومش بلاقى غير السلام عليكم او التسمية باسم الله ) المهم هدخل فى الموضوع ....

المفروض ما نستغربش لما نلاقى اولادنا وشابنا مش عارفين حاجة عن دينهم ونلومهم على كدة فى حين ان هما اتربوا فى مدارس خلت مادة الدين مادة فرعية مالهاش اى فايدة ساعتها المفروض ما نستغربش !!!

المفروض ما نستغربش لما نلاقى الناس العادية فى الشارع بتتخانق مع بعض ونلومهم على كدة فى حين اننا بنشوف رجال الدين بتتخانق مع بعضها فى التليفزيون والفضائيات ساعتها المفروض ما نستغربش !!!

المفروض ما نستغربش لما نلاقى الاطفال مع بعضهم بيتصرفوا تصرفات جنسية واضحة ونلومهم على كدة فى حين ان ابائهم سايبن لهم الفضائيات مفتوحة بدون قريب ساعتها المفروض ما نستغربش !!!

المفروض ما نستغربش لما نلاقى اطفال بتدخن سجاير ونلومهم على كدة فى حين ان الاب فى البيت ليل نهار بيدخن واحايانا كمان بيخلى الام تدخن ساعتها المفروض ما نستغربش !!!

المفروض ما نستغربش لما نلاقى الشباب بيتكلم انجليزى ومحتقر العربية ونلومهم على كدة فى حين ان المدرسين والاعلامين فى التليفزيون مفهمينهم ان اللغات الاجنبية هى الكل فى الكل والعربية لغة معقدة ومش مفيدة ساعتها المفروض مش نستغربش !!!

حاجات كتير قوى المفروض ما نستغربش منها لما نشفها لانة زى ما بيقولوا _ اذا عرف السبب بطل العجب _ .

لا حراااااااااااااام

2008-03-08T17:57:00.002+02:00

مش معقولة كدة يا جماعة بجد حرام وشئ بايخ قوى

كمية مصريين عندهم مواهب حقيقية مهووووووولة

وانا بدخل المدونات واقلب فيها لقيت ناس بجد موهبة سواء شعر او قصة او كتابة ادبية او نقد او ساخرين

اية دة كل دول ناس فى مصر موهوبة !!!!!!!!!!!!!!!!

المشكلة مش فى كدة خالص بقى
المشكلة فى ان ازاى مصر يكون فيها العدد المهول دة من الناس الموهوبة وحالها بالشكل دة
ازاى مصر يكون فيها الناس دى ومش مراعياهم ازاى !!!!!!!!!!!!!!!!!!!!!!!!!!

دة غير طبعا ان فى ناس اصلا ما بيدخولش على النت بس موهبين جدااااااا وفى مجالات تانية كتير
للاسف انا على قد ما كنت فرحانة ان فى ناس كتيرة فى مصر مشاء الله عليهم موهبين على قد ما حزنت ان الدولة مش مراعيهم خااااااااالص وبتراعى ناس مش عندها نص موهبة واحيانا من غير موهبة خالص وسايبة الناس الموهوبة
يا خسارة يا حكومة لو كنتى بتراعى الناس الموهوبة دى ما كنتش مصر بقت كدة اكيد كان هيبقى وضعها افضل بكتير।

ولا اية .........

2008-02-28T10:50:00.000+02:00

السلام عليكم جميعا اهل الخير والسلام فى مصر والوطن العربى

بداية مش عارفة لية احنا دايما ماشين بالعكس حتى لو حاجة فى مصلحتنا وبنعند علشان بس هى جاية من الحكومة
بنعند لية ؟؟؟؟؟؟؟؟ عندا فى الحكومة ولا فى نفسنا ولا احنا اصلا شعب ما بيسمعش الكلام الا لما يخاف ولا اية النظام ؟؟؟

حزام الامان محدش بيحطة خوفا على نفسة لا الكل بيحطة خوفا من الغرامة وكمان لو كان محطوط صح انما دة بيبقى حتة شريط وخلاص وكأن الحكومة لما فرضت الحزام دة كان علشان تموت الناس دة امان للى سايق ومش هيضر وما فيهوش حاجة تضر لية احنا دايما كدة ما نسمعش الكلام ونتكلم على حوداث الطرق والى بيحصل فيها اعتقد ان جزء منها كان ممكن ما يمتش فيها ناس لو كانوا التزموا بوضع الحزام بالطريقة الصح ?

طفاية الحريق بنحطها ديكور وما بنعرفش نستخدمها اصلا وبننساها ساعة الحريق , لية ؟؟؟؟؟؟؟؟؟؟؟
هل لمجرد ان الحكومة فرضتها ولا علشان اية ? حتى لو الحكومة فرضتها هى فرضت خمرة على الناس دى طفاية حريق يعنى عامل امان يعنى حاجة كدة لسلامة الشخص وتقليل احتمالات موتة حرقا ?

وحاجات كتيييييييييييييييييييييييييييييييييييييرة تانية بنعملها خوفا وما بنفكرش لية هى اتفرضت وعلشان اية ولمصلحة مين فى الاخر احنا بنعمل الحاجة خوفا ومابنستفدش منها عندا بس فى مين بقى الله اعلم

انا .....................

2008-01-05T11:32:00.000+02:00

صباح الخيرات

اولا انا لا مع الاخوان ولا انا ضدهم ولا تبع اى حركة ولا ضدها ولا ليا فى السياسة اصلا ।

كل الموضوع ان وانا بقرى فى المدونات قابلتنى مدونات اخوانية

ولقيتهم بيتكلموا وكأنهم مش من مصر

زى انا اخوانى , انا اخوانى ابا عن جد زى ما يكون جركة الاخوان بقت بلد جوة البلد والمنتمين ليها مش مصرين

ما فيش مشكلة ان اى حد ينتمى لاى حزب انما يبقى الموضوع زى الوراثة وكانها مسألة قومية

ويتحول الموضوع انا بحارب علشان انا مع الحزب دة مش بحارب علشان مصر

اعتقد ان الموضوع بقى غريب قوى المفروض ان كلنا مصريين بغض النظر عن حزب اية او ديانة اية وياحول الموضوع للندافعة عن الحزب دة علشان انا منتمى لية مش اكتر .

وجهة نظر مش اكتر ولا اقل .

فلنتحدث ونكتب العربية

2007-12-28T20:43:00.000+02:00

مسسسسسسسسسسسسسسسسسسسسسسسساء الخييييييييييييييييييييييييييييييييييييييييييير

من الاخر كدة احنا لية مش بنتكلم عربى ؟

واحد هيقول بنتكلم عربى واهو احنا نعرف غيرة اقلة ماشى انما فى ناس بقى تلاقيها تدخل كلمات اجنبية على كلامها العربى زى مثلا ميرسى , ثانكس , باى باى , هاى , ..............ز والخ الخ انا مش هنكر انى واحدة من الناس دى بس الصراحة انا بحاول انى اقلل من استخدام كلمات اجنبية لانا مش ليها لازمة + ان ما فيش اى انسان اجنبى الا وكان بيعتز بلغتة حتى لو كان بيتقن عشرين لغة تانية تلاقية جوةة بلدة ما بيتكلمش الا لغتة

الا مصر والدول العربية مجرد ما واحد يتقن لغة او حتى ما يتقنهاش تلاقيها على طول يبدء يتكلم بشوية كلام اجنبى كاثبات انة بيعرف لغة تانية

دة غير بقى كارثة تانية اسمها او انا اصلا مش اعرف اسمها اية هى عبارة عن حروف انجليزى وومعها ارقام انجليزى والنطق عربى !!!!!!!!!!!!!!!!!!!!!!!!!!!

الصراحة انا اللغة دى انا بكرها لانى لانا فاهمة معانها ولا هى محصلة عربى ولا محصلة انجليزى عاملة زى الى بيتمسح فى الانجليزى .......

شئ غريب لية ما نتكلمش عربى هو العربى دة عيب ولا حرام ولا منكر مثلا

دةيعتبر افضل لغات العالم يكفى ان القرأن عربى .

كمان فى حاجة تغظنى قوى فى كلامنا

مثلا تلاقى واحدة وهى بتتكلم وفى وسط الحديث جت كلمة عن الجزمة تلاقيها تقول الشوز او لو قالت جذمة تقولها وهى مكسوفة او تقول لامؤاخذة الجزمة ؟؟؟؟؟؟؟؟وكأن كلمة الشوز محترمة وكلمة الجذمة عيب .

وعليها بقى نقول الباسكت ومش بنقول السلة او التواليت او الدبليو سى ومش بنقول الحمام

حاجة تغيظ هى الكلام دة عيب وبالانجليزى مش عيب مثلا ......

الموضوع كبير قوووووووووووووووووووووى بس دى كانت نبذة وفكرة كانت مضيقانى

الدعاء

2007-12-19T09:33:00.000+02:00

صباح الخير على الجميع

وكل سنة والامة الاسلامية كلها بخير

فى موضوع غاظنى قوى الفترة الى فاتت وهو ان لما بجى ادعى ربنا بحاجة الاقى ناس تقولى او معنى كلامهم بيقول اية الطمع دة او مش تتأمرى , وكانى بطلب حاجة حرام او عيب او غلط

ازاى بقى ...........

انا معرفش لية فى ناس قاصرة الدعاء على الادعية الدينية فقط او مخصصة الدعاء لوقت الشدة بس يعنى تقلاى الناس اغلبيتها لما تدعى تقول مثلا

(يارب اهدينى , يارب وفقنى , ....... وهكذا )

ناس هتصطاد بقى فى المية العكرة وتقلى هى الهداية وحشة ولا التوفيق وحش

اقلة عييييييييييييييب مش تقولنى كلام مش قلتة

الهداية ما فيش احسن منها ولا التوفيق

بس الى اقصدة بقى ودى امثلة انا بشوفها سواء على نفسى او غيرى

مثلا انا عندى امتحان وبدعى ربنا انى انجح ويدعى ويقول يارب انحج وهو فى نفسةمثلا عايزة مجموع معين 90%

لية ما يدعش ان ربنا يرزقة المجموع دة؟؟؟؟؟؟؟؟

والامثلة كتير

زى الى بيطلب عروسة تاقية لما تسالة انا عايزها بس بنت حلال ويدعى ربنا بكدة

ولما تجيبلة عروسة بنت حلال يقلك لا اصلها مش حلوة !!!!!!!!!!!!!!!!!!!!

طب يا خى ما تدعى ربنا ان يرزقك بنت الحلال الجميلة .

اظن ما فيش حاجة لاهو عيب ولا حرام

زمان الناس كانت بتطلب من ربنا ملح الطعام

لية احنا بنقصر دعوتنا على حاجات معينة ودعوات مبهمة

لية مش ندعى ربنا بكل الى عايزنة لاربنا قال انة حرام ولا هو عيب ولا هو غلط

__________________________________________

وفى نهاية الحديث دى مجرد خاطرة شاردة

قد يتفق معى اشخاص وقد يختلف معى اخرون

كل سنة والجميع بخير

2007-12-18T12:39:00.000+02:00

السلام عليكم جميعا

كل سنة والجميع بخير
ودابح ومبسوط

انا بوجة دعوة لاخوانا الاغنيا الى دابحين عجول اومعيز _اصحاب الخرفان يمتنعون لانى مش بحب الضانى _وبقلهم فى الدعوة
انى اقبل التبرعات سواء لحومية او نقدية باليورو

والى هيحب يعمل الخير دة يقلى وانا بعتلة رقم حسابى البنكى او عنوان البيت علشان اللحمة

وكل سنة والجميع بخير وربنا يعودة علينا بالصحة والسلامة

جوة وبرة

2007-12-14T15:01:00.000+02:00

مسا الخير على الناس الكويسة

مش عارفة ابتدى ازاى .......................................................

انا هكتب وخلاص الى جوايا بدون مقدمات

جوة مصر عادى جدا انك ترمى ورق فى الشارع او زبالة ,انما لما تسافر برة بتحافظ على نضافة البلد وتحترم الشارع

جوة مصر تكون انسان حمش وراجل قوى , وبرة مصر انت انسان فرى جداااااااااااا على اعتبار البلد الى ميعرفكش فيها حد اعمل الى انت عايزة .

جوة مصر شايف ان البنت مكانها البيت , وبرة مصر تعجب بالبنت الى معتمدة على نفسها وعايشة لوحدها .

جوة مصر نتعامل مع اصحاب الديانات التانية على اساس انهم ناس المفروض يخلصوا من الوجود , برة مصر بنتعامل مع يهود ومسيحين وملحدين كمان ونتعامل معاهم بشكل محترم جداااااااا .

جوة مصر نبهدل بلدنا ونسوخها ونبوظ فيها , وبرة مصر نتمنى نكون زيهم مع ان احنا الى عاملين كدا فى نفسنا .

جوة مصر عيب انك تشتغل فى مطعم او تقف فى محل على اعتبار انة مش من مقامك , انما برة مصر عادى جدااااااااااا انك تشتغل اى حاجة مهما كانت شهادتك .

جوة مصر تسوق براحتك مش مهم الناس مش مهم اشارات المرور مش مهم اى حاجة , برة مصر انسان متحضر جدااااااااا تحافظ على المرور والاشارات والناس وحتى الصرصار الى بيعدى .

....................................................................................

جوة وبرة ناس كتير بتتغير وبتبقى عاملة زى الحرباية تيجى مصر تبوظ وتسافر برة تصلح وهكذا تيجى تبوظ تسافر تصلح

وبتنسى ان دى كلها بتعتبر مبادئ المفروض تكون واحدة مهما سافرت او عشت فى اى مكان

انما للاسف الناس بتعتبرها حاجات تافهة ولا تستحق انها تكون مبادئ .

الى ايدة فى المية مش زى الى ايدة فى النار

2007-12-13T17:41:00.000+02:00

فعلا المقولة دى صح مليار فى المية وعن تجربة شخصية

كتير الواحد كان بيتحط فى مواقف انة يقول رايئة ويقولة فعلا بس كان الرائ دة كان بيبقى مثالى جداااااا للموقف لانى مش جوة الموقف مش حاسة بية كتير اتحطيت فى مواقف صعبة وكنت مكونة عنها راء مثالية انما لما اتحطيت فيها لقيت الوضع مختلف تماما

منها موقف الصراحة هزنى جداااااااا وهو ان انا فى مرة كنت بقلب فى النت بالصدفة وقابلت مواقع ومدونات لملحدين للاسف بدات اقراهعا وبدات احس ان ايمانى بيتهز وبدات اسال زيهم

وخفت جداااااااااا من جويا لانى ايمانى اتهز وانا الى كنت فاكرة ان انا حديد وما فيش اى حاجة تقدر تأثر فيا بس الحمد لله المرحلة عدت بسلام لية بقى انا بحكى الموضوع وعلاقتة بالى ايدة فى المية مش زى الى ايدة فى النار اقلكم فى مرة اتكلمت مع ناس مسلمة ولقيتها بتسال اسئلة غريبة كدة وبقيت فى نفسى اقول ازاى دة اكيد لو هو ايمانة قوى مش كان دة هيحصل انا الحمد له مما فيش حاجة تأثر فيا بس لما تحطيت فى نفس الموقف لقيت الوضع مختلف تماما

_____________________________________________________

مواقف تانية كتييييييييييييييييييرة بتاكدى ان الى ايدة فى المية مش زى الى ايدة فى النار ابدا

علشان كدة دايما بقول ان صاحب المشكلة هو اقدر واحد على حلها لانة هو الوحيد الى عارف جوانب المشكلة واية اسلم حل واية الحل الى يناسبة ويكون مناسب لية .

دولة الامارات العربية المتحدة

2007-12-10T10:00:00.000+02:00

السلام على اهل السلام جميعا

من حوالى اسبوع كدة بدات اتابع التليفزيون لان الجهاز عندى كان فية شوية مشاكل وكنت مش لاقية حاجة اعملها قلت اما تفرج على التلفزيون واشوف فية اية الصراحة انا من محبى قنوات دبى اولا محتواها الترفيهى حلو وثانيا بقى اعلانتها تحفةةةةةةةةةةةةةةةة ازاى اقلك الاعلانات الى فيها وطبعا انا اقصد الاعلانات الهادفة زى اعلانات عن اعانة الفقراء واعلانات عن مكافحة الجريمة واعلانات بتحث الشباب على فعل الخير

اهم حاجة بقى عجبتنى فى الاعلانات ان فكرتها حلوة معمولة بشكل قصة او ليها سيناريو بسيط وكمان الشباب الى جابينهم فى الاعلانات شباب عاديةمش ليهم شكل معين او لبس معين مثلا لا دة شباب عادى جدا كاجول .
بقول لية كدة الاعلانات هنا فى مصر الى بتكافح الجريمة دة اذا كانت موجودة بيبقى شكلها منفر اصلا ناهيك عن ان تقريبا ما فيش اعلانات هادفة بتحث على فعل الخير او التعاون بين افراد الشعب ولو اتعملت بتتعمل بشكل بدائى جدا كل الاعلانات او اغلبها عن منتجات استهلاكية او اعلانات عن نورت مصر الى شايفة انة اعلان مش لية لازمة لانة الاحرى كان يتعمل باكتر من لغة ويكون فية اسلوب جذب سياحى لان السياح الى هيجو مش هيجوا علشان الممثلين الى فى الاعلان دول هيجوا علشان المزارات السياحية .............

للاسف الاعلانات عندنا اى كانت نوعها سواءاستهلاكية او سياحية او معنوية اسلوبها بدائى ويسد النفس .

الصراحة انا بأحيى جداااااااااااا منظمة دبى للاعلام

انا لية هتجوز ؟؟؟؟؟؟؟؟؟

2007-11-17T22:12:00.000+02:00

مساء الانوار على الجميع

النهاردة وقعت فى ايدى مدونة عايزة اتجوز الصراحة المدونة تحفة بجد مش ليها حل بس هى الصراحة خلتنى اكتب الموضوع دة

فكرت مع نفسى على السريع كدة وسالت نفسى هو انا لية بالظبط عايزة اتجوز ؟؟؟؟؟؟؟؟؟

اسباب الجواز فى رائ يا اما

1/ استقلال وانها يكون عندها بيتها المتحكمة فية وست البيت ومسئولة عن كل حاجة

2/ احتياج عاطفى ونفسى

3/ احتياج مادى

4/ حب الاطفال وحب التربية وتنشئة الاطفال

5/ واجهة اجتماعية وانى واحدة سوقها ماشى وبيجلها عرسان واتجوزت

6/ علشان الجميع بيتجوز واحقق كل الاسباب الى فاتت

انا عن نفسى السبب الرئيسى لانى عايزة اتجوز انى انعم بالاستقلال وبعدين الاحساس العاطفى وبعدين ممكن الاطفال

يعنى على سبيل المثال انا لو توفرت ليا عامل الاستقلال ممكن استغنى عن الجواز لانة الصراحة شايفة الجواز دة عملية فى الغالب مش بينوبنا منها غير حرقة الدم والاعصاب الراجل مقرف والعيال متعبة والاهل مش مريحين نفسهم عمالين يتدخلوا فى الكبيرة قبل الصغيرة

شئ بجد متعب بس لو انا بقى قلت فكرتى دى لحد اكيد اكيد الناس الى هتبصلى هتقول انى واحدة معقدة او انى بعمل نفسى مش هاممنى وانا من جوة محروقة انى مش متجوزة بس مش عايزة ابين ,

ياترى الجميع عندة سبب فعلى للجواز ولا انا بس الى بفكر فى السبب الفعلى ولا الجميع عايز يتجوز وخلاص علشان الكل بيتجوز اشمعنى احنا ؟

مش عارفة اهى كانت فضفضة ممكن تكون مش ليها لازمة انها تنكتب بس قلت امشى ايدى على الكى بورد هههههههههههه

عمال النظافة

2007-11-16T21:26:00.001+02:00

السلام عليكم

النهاردة الجمعة قبل الاذان والشوارع فاضية والناس نايمة بصيت من الشباك لقيت مين فى الشارع ؟؟؟؟؟؟؟؟؟؟

عامل النظافة عمال يشتغل الصراحة فضلت متابعة لغاية ما خلص الشارع

, الى اكتشفتة انة انسان واضح انة غلبان جدااااااااا وبيجرى وراة لقمة عيشة وبيشتغل بذمة وضميرمش دى القضية . القضية انى لقيتة انسان فعلا يستحق ان احنا نعاملة كويس اقلك لية تخيل ما فيش عامل نظافة !!!!!!!!!!!!!!!!!! مش عايزة احلف ان طبعا ما فيش ولا واحد فينا هيتجرء وينزل ينضف قدام بيتة او ينضف الشارع الى هو عايش فية . تمام كدة عرفنا قيمة عامل النظافة( يووووووووووووووو عمالة ادخل فى مواضيع واخرج من مواضيع ولسة مش قلت الى انا عايزة )الى عايزة اقولة من الاخر ان احنا لية مش نساعد عمال النظافة او غيرهم زى الى بيمسحوا السلالم او عمال المطاعم او او او او لية مش نساعدهم ماديا يعنى بدل ما بندى الشحاتين الى هما اغنى منى ومنك لية مش نساعدهم على االاقل دول عارفين فعلا انهم ناس غلابة وناس فاتحة بيوت وليهم فضل علينا بلاش ماديا على الاقل معنويا اظن ان مجرد انى ابتسم فى وشة الصبح او اقلة ربنا يعينك دى هتخلية يرتاح وما يحسش انة اقل من غيرة وان الناس مش بتستحقرة علشان مهنتة . يا جماعة العمال والناس الغلابة دى بتيتحق ان احنا نبص عليها نظرة تانية خالص غير الى احنا متعودين عليها لية نتعامل معاهم دايما على انهم اقل منا . مع انهم مش ذنبهم انهم طلعوا لقوا ظروفهم كدة انا بطلب من الجميع ان احنا بدل ما نطلع فلوسنا للناس الشحاتة او جمعيات مش عارفين هى اية اصلا نساعد الناس الى حوالينا ولو على الاقل بربع جنية او كيلو فاكهة على الاقل مرة فى الشهر

ابسط الامور يعنى . او على اقل اقل تقدير ندعيلهم ان ربنا يعينهم على شقاهم

انا غلطانة فى الى بقولة

مقتطفات من خواطر الشيخ الشعراوى

2007-11-16T19:59:00.000+02:00

بسم الله الرحمن الرحيم

والصلاة والسلام على اشرف الخلق اجميعن

دى مقتطفات من خواطر الشيخ الشعراوى رحمة الله علية
انا حبيت انى اكتبها علشان الجميع يستفيد منها زى ما نا استفدت منها كتير وكانت اجابات على كتير من الاسئلة

يلا نبدء

1/ القرأن لم يأت ليعلمنا اسرار الكون , ولكنة جاء بأحكام التكليف واضحة واسرار الوجود مكتنزة .

2/ اذا خرج العناد والكفر من القلب واستمع الانسان بصفاء الى القران الكريم دخل الايمان قلبة.

3/ لكى تستقبل الايمان يجب ان تخلص قلبك من الكفر اولا .

4/رسول الله صلى الله علية وسلم فسر وبين ما يتعلق بالتكليف الايمانى وترك ما يتعلق بغير التكليف للاجيال القادمة .

5/الرسالات التى سبقت الاسلام كانت محدودة الزمان والمكان اما القرأن الكريم فزمنةحتى يوم القيامة ولذلك لابد ان يقدم اعجازا لكل جيل ليظل القرأن معجزة فى كل عصر .

6/رسول الله صلى الله علية وسلم لو فسر كونيات القرأن وقت نزولة لجمد القرأن لانة لااحد منا يستطيع ان يفسر بعد تفسير رسول الله وبذلك يكون عطاء القرأن قد جمد ولكن ترك رسول الله للتفسير اتاح الفرصة لعطاءات متجددة للقرأن الكريم الى قيام الساعة وهكذا كان المنع عين العطاء وهذة معجزة اخرى من معجزات القرأن الكريم .

7/رسول الله لم يقرأ ولم يكتب هل يمكن ان تكون لة ثلاثة اساليب متميزة تختلف بعضها عن بعض تماما وهى اسلوب القران الكريم واسلوب الااديث القدسية واسلوب الاحاديث النبوية ولا توجد عبقرية فى الدنيا من يوم ان خلقت الى يومنا هذا لها ثلاثة اساليب لكل منها طابع مميز لا يتشابة مع الاخر كيف يمكن ان يفرق رسول الله وهو يتكلم بين القران والحديث القدسى والحديث النبوى بحيث يعطى كلا منها طابعا واسلوبا يميزة عن الاخر .( رد عن الرسول هو من يقول القران والاحاديث من عندة ).

8/اذا كان محمد صلى الله علية وسلم ساحرا فلماذا لم يسحر الكفار حتى يمؤمنوا ؟؟؟؟؟؟؟؟؟؟

9/ ان ادعاء الكفار بانة سحرهم يكذب حجتهم لان كونهم الان جالسين يقولون ساحر فمعنى ذلك انة لم يسحركم ولو كان ساحرا حقيقيا لاجبركم بسحرة على ان تتبعوة وقالوا مجنون نقول لهم ان الجنون عمل بغير رتابة بمعنى انك لاتستطيع ان تتنبأ بما يفعلة المجنون فى اللحظة القادمة فقد يجلس يتحدث معك دقيقة وبعدها يضربك وتجدة يبكى وبعد ثوان يضحك .

10/ولتعرف كيف يتناقض الكفار مع انفسهم نقول لهم كيف تأتمنون انسانا مجنونا على اغلى ما تملكون وهل هذا يتمشى مع العقل ايذهب الانسان بأغلى ما يملك ويضعة عند رجل مجنون طبعا مستحيل ان يكون المجنون وعلى خلق عظيم .

11/ عندما نزل القرأن كانت الامراض والداءات تملا المجتمعات والظلم واكل حقوق الناس واستعبا الانسان للانسان وغير ذلك من امراض المجتمع فجاء الاسلام اولا ليشفى هذة الامراض اذا اتبع منهجة وثم بعد ذلك تاتى الرحمة وتمنع عودة الداءات فاذا حدثت غفلة عن منهج الله جاءت الداءات والامراض فاذا عدت الى صيديلة القران تاخد منها الدواء ويتم الشفاء .

12/ ان ابليس يأتى دائما من الباب الذى يرى فية المنهج ضعيفا .

13/ ان ابليس يظل يدور حول نقط الضعف فى الانسان ليسقطة فى المعصية.

14/ اذن فعندما ينفرد خلق بخلق فالقوى هو الذى يغلب اما اذا احتمى خلق بخالقهم فلا يقدر عليهم احدالبشر يقدر على البشر اذا بعدت الفئتان عن الله .فأن كانت الفئتنان معتصمتين بالله فلن يتقاتلا .